Mætti Íslendingum tvisvar og fékk á sig hælspyrnumark í Laugardalnum

Franski knattspyrnuheimurinn syrgir í dag Bruno Martini, fyrrum markvörð franska landsliðsins, sem lést í nótt.

Bruno Martini andaðist á sjúkrahúsi í Montpellier í nótt eftir að hafa fengið hjartastopp í síðustu viku. Hann var aðeins 58 ára gamall.

Bruno Martini lék 31 landsleik fyrir Frakkland á árunum 1987 til 1996 og tveir af þeim voru á móti íslenska landsliðinu.

Bruno Martini lék á Laugardalsvellinum 5. september 1990 eða fyrir rétt rúmum þrjátíu árum síðar en þjóðirnar mættust þá í undankeppni EM 1992.

Frakkar unnu leikinn 2-1 með mörkum frá þeim Jean-Pierre Papin og Eric Cantona. Cantona plataði íslensku vörnina með því að hlaupa yfir boltann í marki Papin og skoraði síðan seinna markið á svolítið grunsamlegan hátt. Íslensku varnarmennirnir töldu hann hafa notað höndina en Cantona neitaði því eftir leikinn.

Þetta var ellefti landsleikur Bruno Martini og hann var fimm mínútum frá því að halda hreinu í Laugardalnum.

Martini átti hins vegar ekki svar við hælspyrnu Atla Eðvaldssonar fimm mínútum fyrir leikslok. Arnór Guðjohnsen skallaði þá hornspyrnu Ólafs Þórðarsonar til Atla sem skoraði með hælnum af markteigslínunni. Þetta var áttunda og síðsta mark Atla Eðvaldssonar fyrir íslenska landsliðið.

Um mark Atla sagði Bruno Martini í viðtali við Morgunblaðið eftir leikinn: „Ég átti ekki möguleika á að verja. Hann var skyndilega aleinn fyrir framan markið og skaut snöggt með hælnum."

„Það var fyrir öllu að vinna sigur gegn íslendingum í Reykjavík. Að vinna tvö stig hér á eftir að koma okkur að góðum notum í riðlinum þegar upp verður staðið. Við lékum þennan leik skynsamlega en það skal fúslega viðurkennast að ég var hræddur fyrir þennan leik," sagði Bruno Martini í viðtali við DV.

„Íslenska liðið er gott að mínu mati og í því eru margir einstaklingar sem ég er mjög hrifinn af. Þessir leikmenn myndu spjara sig vel í frönsku knattspyrnunni. Sterkasta hlið íslensku leikmannanna liggur í líkamlegum styrk og eins eru þeir sterkir í skallaboltum. Ég óska íslenska liðinu góðs gengis í næstum leikjum," sagði Bruno Martini kurteislega í viðtalinu við DV eftir leikinn.

Ljósmyndarar íslensku blaðanna náðu mörgum myndum af þessu marki eins og sjá má hér fyrir ofan og neðan á úrklippum úr íslensku blöðunum daginn eftir.

Þetta var ekki eini landsleikur Bruno Martini á móti Íslandi því hann stóð einnig í markinu í 3-1 sigri á Parc des Princes rúmu ári síðar eða 20. nóvember 1991. Umræddur Eric Cantona skoraði tvö mörk í þeim leik.

Mark íslenska liðsins skoraði aftur á móti Eyjólfur Sverrisson. Eyjólfur kom inn á sem varamaður í leiknum og minnkaði muninn í 3-1 með skoti í stöngina og inn.