Kristófer segir KR skulda sér milljónir

Kristófer Acox kveðst eiga inni háa upphæð hjá körfuknattleiksdeild KR vegna vangreiddra launa. Hann hefur leitað til lögfræðings til að freista þess að fá upphæðina greidda.

Um er að ræða nokkrar milljónir króna. Kristófer kveðst auk þess í raun hafa þurft að þola það í gegnum sinn tíma hjá KR að fá ítrekað ekki greidd umsamin laun á réttum tíma. Hann hafi á endanum fengið nóg og ákveðið að yfirgefa sitt uppeldisfélag en Kristófer gekk í raðir Vals fyrr í þessum mánuði.

KR hefur reyndar ekki viljað skrifa undir félagaskipti Kristófers og er málið komið inn á borð aga- og úrskurðanefndar KKÍ sem tekur það fyrir í næstu viku.

Böðvar Guðjónsson, formaður körfuknattleiksdeildar KR, sagðist ekki vilja tjá sig um ástæður þess að KR skrifaði ekki undir félagaskiptin. Hann vildi heldur ekki játa því né neita að Kristófer ætti inni laun hjá félaginu: „Mál Kristófers er bara í ferli og er ekkert sem ég ætla að tjá mig um að svo stöddu.“

Segir KR ítrekað ekki hafa greitt á réttum tíma

Kristófer skrifaði í fyrra undir nýjan samning til tveggja ára við KR. Hann kveðst hafa rift þeim samningi í lok ágúst vegna ítrekaðra vanefnda.

„KR hefur varla greitt laun á réttum tíma síðan ég kom heim frá Frakklandi síðla árs 2018 [Kristófer staldraði stutt við hjá Denain Voltaire í Frakklandi haustið 2018]. Ég skrifaði undir samning þá um sumarið, fór svo til Frakklands en gekk inn í sama samning þegar ég kom heim. Þessi samningur rann út sumarið 2019 og þá gerði ég nýjan samning til tveggja ára.“

Nýr samningur en sama sagan

Kristófer segir skuld KR við sig, eftir að liðið varð Íslandsmeistari 2019 og rakaði inn mörgum milljónum króna í úrslitakeppninni, ekki hafa verið sérstaklega háa miðað við heildarkröfuna nú. Því hafi hann ákveðið að skrifa undir nýjan samning:

„Þeir sögðu að þetta yrði ekkert vandamál á næsta tímabili og að það yrði gert upp við mann. En síðan kom að fyrstu mánaðamótum á nýja samningnum og þá var ennþá sama sagan,“ sagði Kristófer.

Upphæðin sem hann á inni núna nemur samkvæmt upplýsingum Vísis á bilinu 3-5 milljónum króna en Kristófer vildi ekki staðfesta það. Hann sagði þó að fjárhæð kröfunnar væri talin í milljónum. „Þetta ferli er bara í gangi.“

Segir faraldurinn ekki afsökun

Ljóst er að kórónuveirufaraldurinn hefur haft mjög mikil áhrif á rekstur körfuknattleiksdeildar KR, eins og hefur sýnt sig með miklu brotthvarfi leikmanna kvenna- og karlaliða félagsins. Kristófer segir hins vegar að hvað sín málefni varði hafi vandamálið verið orðið stórt fyrir faraldurinn:

„Ég var búinn að vera að reka á eftir launum löngu fyrir Covid, svo það er engin afsökun. Félagið reynir núna að fela sig á bakvið það að ég hafi verið meiddur í nokkrar vikur, og að ég veiktist í desember, og að þeir telji sig ekki þurfa að borga mér fyrir þann tíma. En það stendur ekkert um slíkt í mínum samningi.“

Reyndi að komast að samkomulagi við KR

Kristófer segist hafa gefið KR kost á að greiða upp skuldina og gera við sig nýjan samning en hann hafi á endanum neyðst til að rifta samningnum og yfirgefa DHL-höllina:

„Vanefndirnar voru augljóslega ítrekaðar þar sem þeir hafa ekki borgað mér á réttum tíma í marga, marga mánuði, svo ég rifti samningnum og tel mig þá lausan. Ég reyndi svo að funda með KR-ingum í einhverjar þrjár vikur til að komast að samkomulagi, bæði um skuldina og svo gaf ég þeim tækifæri á að koma með nýjan samning fyrir næsta tímabil. Þær viðræður skiluðu hins vegar ekki árangri.“