Skilnaður skekur bresku konungs­fjöl­skylduna

Barnabarn Elísabetar Englandsdrottningar, Peter Phillips, sonur Önnu prinsessu og fyrrverandi eiginmanns hennar Mark Phillips, er að skilja að borði og sæng við eiginkonu sína Autumn. Þetta kemur fram í yfirlýsingu frá þeim Peter og Autum en fjallað er um málið á vef BBC.

Í yfirlýsingunni kemur fram að þau hafi ákveðið að skilnaður væri það besta í stöðunni fyrir börn þeirra og fyrir áframhaldandi vinskap. Peter og Autumn eiga tvær dætur, Savönnuh, níu ára og Islu, sjö ára, og munu þau deila forræðinu.

Fjölskyldur beggja eru leiðar vegna ákvörðunarinnar en styðja hjónin fyrrverandi í því að ala dætur sínar saman upp. Peter og Autumn sögðu drottningunni og öðrum fjölskyldumeðlimum frá ákvörðun sinni á síðasta ári.

 

Peter er elsta barnabarn Elísabetar Englandsdrottningar. Hann giftist hinni kanadísku Autumn Kelly í St George‘s-kapellu í Windsor-kastala árið 2008 og hafa þau búið í Gloucestershire síðustu ár.