Lífið

Þingvallasveit lýst sem afdalasveit í alfaraleið

Kristján Már Unnarsson skrifar
Borghildur og Kolbeinn byggðu nýbýlið Heiðarás úr landi Skálabrekku.
Borghildur og Kolbeinn byggðu nýbýlið Heiðarás úr landi Skálabrekku. Stöð 2/Einar Árnason.

„Fyrir einhverjum áratugum þá var Þingvallasveit talin afdalasveit í alfaraleið af því að hún lokaðist á veturna, og mjög fáir á ferðinni, en mjög margir á sumrin. En þetta er allt öðruvísi núna,“ segir Kolbeinn Sveinbjörnsson, verktaki og vélvirkjameistari, í þættinum Um land allt á Stöð 2.

Að þessu sinni kynnumst við mannlífi í Þingvallasveit á bæjunum í kringum þjóðgarðinn.

Hjónin í Mjóanesi, þau Jóhann og Rósa, segja frá silungsveiði í Þingvallavatni.Stöð 2/Einar Árnason.

Kolbeinn og eiginkona hans, Borghildur Guðmundsdóttir, byggðu fyrir tólf árum nýbýlið Heiðarás úr landi Skálabrekku undir sig og börnin sín fjögur. Kolbeinn sinnir meðal annars þjónustu við sumarhúsaeigendur og þjóðgarðinn á Þingvöllum meðan Borghildur sinnir ferðaþjónustu í fjórum smáhýsum sem þau leigja út.

Kolbeinn er frá Heiðarbæ en afkomendur langafa hans eru fjölmennasta ættin í Þingvallasveit. Bróðir hans, Jóhannes Sveinbjörnsson, býr á Heiðarbæ eitt, ásamt eiginkonu sinni, Ólöfu Björgu Einarsdóttur, og þremur börnum.

Andrea stundar hestamennsku á Heiðarbæ 2.Stöð 2/Einar Árnason.

Á Heiðarbæ tvö búa frændur þeirra bræðra, Sveinbjörn Einarsson og sonur hans, Sveinn Ingi. Hann er kominn inn í búskapinn með eiginkonu sinni, Andreu Skúladóttur, en þau eru búin að eignast þrjú börn á fjórum árum.

Ragnar á Brúsastöðum þeysir um á sexhjólinu.Stöð 2/Einar Árnason.

Brúsastaðir er sá bær sem næst stendur þjóðgarðinum og þar eru einnig að verða kynslóðaskipti. Eftir að hafa búið í Reykjavík í rúm tuttugu ár er Kristrún Ragnarsdóttir að taka við búrekstrinum af föður sínum, Ragnari Jónssyni, sem er búinn að vera bóndi á Brúsastöðum í 57 ár.

Vitjað um silunganetin undan Mjóanesi við austanvert Þingvallavatn.Stöð 2/Einar Árnason.

Sauðfjárbúskapur er aðalbúgrein sveitarinnar en einnig er stundað þar kjúklingaeldi. Silungsveiðin í vatninu er drjúg búbót. Því kynnumst við í Mjóanesi þar sem við fylgjumst með þeim Jóhanni Jónssyni og Rósu Bachmann Jónsdóttur vitja um silunganetin.

Þátturinn er á dagskrá Stöðvar 2 á mánudagskvöld klukkan 19.10. Hér má sjá sýnishorn:


Tengdar fréttir

Sauðkindur á Þingvöllum

Ferðamenn, sem nutu haustdýrðar í þjóðgarðinum á Þingvöllum um helgina, urðu eflaust margir hissa á að sjá sauðkindur spóka sig þar í makindum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.