Lífið

„Ég var alveg viðbúin því að vera glötuð“

Sylvía Rut Sigfúsdóttir skrifar
Vala Eiríks vonast til þess að geta komið dansfélaganum sínum, Sigurði Má, saman við einhverja vinkonu sína þegar keppninni lýkur.
Vala Eiríks vonast til þess að geta komið dansfélaganum sínum, Sigurði Má, saman við einhverja vinkonu sína þegar keppninni lýkur.

Útvarpskonan Vala Eiríksdóttir segir að hún hafi komið sjálfri sér á óvart í keppninni Allir geta dansað. Vala hefur vakið mikla athygli fyrir frammistöðu sína í þáttunum. Hún er komin í ótrúlega gott dansform og kílóin fjúka í hverri viku. Hún vonast til þess að geta komið dansfélaganum sínum, Sigurði Má, saman við einhverja vinkonu sína þegar keppninni lýkur.

Hvernig hefur verið fyrir þig að taka þátt í Allir geta dansað?

„Þetta er búið að vera jafn skemmtilegt og þetta er búið að vera erfitt. Sem er slatti.“

Hvaða danstegund er í uppáhaldi hjá þér og af hverju?

„Ég er rosa hrifin af snerpunni og kraftinum í Paso Doble, en ég held að Jive-inn sé að jafna Pasoinn um þessar mundir. Hann er bara svo kátur og skemmtilegur.“

Hvaða atriði er í uppáhaldi?

„Ég held ég verði að segja Kill Bill Pasoinn, því hann gaf okkur tvær tíur. Ég elska tíur!“

Hvaða áskoranir hafa verið erfiðastar?

„Það reynir ofboðslega á bæði líkama og sál að vera ì svona mikilli keyrslu. Æfa í fimm til sjö klukkutíma á dag, alla daga vikunnar, verandi líka ì fullri vinnu og öðrum verkefnum. En erfiðast þykir mér að eiga litla orku eftir að gefa kærastanum mínum, þegar ég klára á kvöldin.“

Hvað hefur þú lært af því að taka þátt í Allir geta dansað?

„Að ég er aldeilis ekki jafn takmörkuð og ég hélt.“

Hvað hefur komið þér mest á óvart?

„Hvað okkur hefur gengið vel. Ég var alveg viðbúin því að vera glötuð.“

Vala Eiríksdóttir segir að dansinn hafi haft mikil áhrif á hennar andlega og líkamlega líðan. Vísir/Marínó Flóvent

Hápunkturinn hingað til?

„Tíurnar okkar og auðvitað allir vinirnir sem ég hef eignast í þessu ferli. Dansararnir, hinir keppendurnir og bara allt þetta stórkostlega fólk sem vinnur í kringum þáttinn à einn eða annan hátt.“

En lágpunkturinn?

„Í lok hvers þáttar þegar einhverjir af vinum mínum eru sendir heim.“

Hvaða áhrif hefur dansinn haft á líkamlega líðan þína?

„Ofboðslega góð! Ég er orkumeiri, sef betur og drekk loksins nóg af vatni!“

En andlega líðan?

„Yndisleg. Sjálfsöryggi mitt styrkist með hverjum deginum og ég hlakka alltaf til að mæta á æfingu og á sett.“

Hvernig stuðning hefur þú fengið frá fólkinu í kringum þig?

„Ómetanlegan! Pabbi og mamma hafa aldrei verið jafn virk í deilingum á Facebook, systir mín stúderar með mér rútínur og stappar í mig stálinu þegar þarf, vinir mínir eru duglegastir að peppa og hvetja, yfirmaðurinn minn hefur sýnt mér ótrúlega þolinmæði og skilning og kærasti minn er búinn að vera stórkostlegur í gegnum þetta krefjandi og skemmtilega verkefni.“

Hefur dansáhuginn „smitast“ í aðra fjölskyldumeðlimi eða vini?

„Alveg 100 %“

Ætlar þú að halda áfram að dansa eftir þessa keppni?

„Uuujá! Nùna er ég bara dansari og dansarar verða að dansa!“

Hvernig myndir þú lýsa dansfélaganum þínum?

„Hann er algjör demantur. Framúrskarandi kennari, ótrúlega fær í að setja saman atriði, mjög hvetjandi og svo er hann bara svo skemmtilegur líka!“

Hvernig hafa tengslin á milli þín og dansfélagans breyst á þessum vikum?

„Við verðum auðvitað nánari með hverri vikunni, enda eyðum við rosalega miklum tíma saman. Mér er farið að þykja mjög vænt um Sigga og vil helst koma honum saman við einhverja vinkonu mína. Þær eru allavega nokkrar sem ég veit að væru vel til í það!“

Hvað dansið þið í kvöld?

Jive.

Hvað máttu segja lesendum Vísis um atriðið ykkar?

„Þetta verður blóðugur bardagi.“

Eitthvað annað sem þú vilt að komi fram?

„Bara TAKK fyrir alla ástina og stuðninginn. Hann er okkur svo dýrmætur.“


Tengdar fréttir

Vala og Siggi fengu nánast fullkomna einkunn

Vala Eiríks og Sigurður Már Atlason dönsuðu Paso Doble við lagið Don't let me be Misunderstood úr kvikmyndinni Kill Bill síðastliðið föstudagskvöld í beinni útsendingu á Stöð 2.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.