Fyrir einu ári fór fram í Liverpool eitthvað sem má alls ekki fara fram í dag

Enska úrvalsdeildin hefur legið í dvala síðustu mánuði vegna kórónuveirunnar en nú eru liðin farin að æfa á fullum krafti og leikar hefjast að nýju eftir fimmtán daga. Það verður þó ekki mikil spenna í baráttunni um Englandsmeistaratitilinn.

Liverpool verður enskur meistari árið 2020. Eina spurningin er hvenær. Enska úrvalsdeildin á að fara aftur af stað á Þjóðhátíðardegi Íslendinga og þá er það aðeins tímaspursmál hvenær Liverpool tryggir sér þessi sex stig sem vantar upp á svo þeir geti kallað sig enska meistara í fyrsta sinn í þrjá áratugi.

Ein af stóru áhyggjum stjórnvalda í Englandi við endurkomu ensku úrvalsdeildarinnar virðist vera væntanleg sigurhátíð og fögnuður stuðningsmanna Liverpool.

Borgarstjórinn í Liverpool lýsti því meðal annars yfir fyrir nokkru að hann vildi alls ekki hefja leik að nýja af ótta við fönguð stuðningsmanna Liverpool liðsins. Þau ummæli féllu reyndar í grýttan jarðveg og hvað þá þegar menn áttuðu sig á því að hann var harður stuðningsmaður Everton.

Stuðningsmenn Liverpool eru búnir að bíða lengi eftir því að vinna ensku úrvalsdeildina í frysta sinn. Þegar Liverpool varð síðast enskur meistari þá hét deildina enska 1. deildin. Það var vorið 1990. Enska úrvalsdeildin varð til haustið 1992 og sex félög hafa unnið hana.

Liverpool er ekki eitt af þeim liðum. Manchester United (13 sinnum), Chelsea (5), Manchester City (4), Arsenal (3), Blackburn Rovers og Leicester City hafa unnið ensku úrvalsdeildina.

Blackburn Rovers fagnaði meðal annars titlinum á Anfield eftir síðasta leikinn sinn og með Liverpool goðsögnina Kenny Dalglish sem knattspyrnustjóra.

En af hverju óttast menn fögnuð stuðningsmanna Liverpool svona mikið? Jú þeir sem fylgdust með þeim fagna sigri í Meistaradeildarinnar í fyrra sáu að fjöldi manns gæti streymt út á göturnar þegar Liverpool tryggir sér titilinn.

2. júní 2019 eða fyrir nákvæmlega einu ári síðan fögnuðu stuðningsmenn Liverpool saman sigri liðsins í Meistaradeildarinnar með ótrúlegri sigurskrúðgöngu í Liverpool borg.

Liverpool hafði unnið 2-0 sigur á Tottenham í úrslitaleik Meistaradeildarinnar í Madrid kvöldið áður en hafði flogið aftur til Liverpool um morguninn.

Slík sigurskrúðganga fer ekki fram aftur í Liverpool fyrr en kórónuveirufaraldurinn er afstaðinn og Jürgen Klopp hefur biðlað til stuðningsmanna Liverpool að halda upp á sigurinn heima hjá sér en ekki út á götum Liverpool eða við Anfield leikvanginn.

Leikirnir þar sem Liverpool mun geta tryggt sér titilinn munu fara fram á hlutlausum völlum og því er það alveg ljóst að Liverpool tryggir sér ekki titilinn á Anfield.

Það væri hætt við því að fólk myndi safnast saman við leikvanginn í stórum stíl þótt að engir áhorfendur fengju að vera inn á leikvanginum sjálfum.

Nú reynir því á stuðningsmenn Liverpool að sýna skynsemi og bera virðingu fyrir fordæmalausum tímum.