Íslenski boltinn

15 dagar í Pepsi Max: Tryggvi skoraði átta mörk á 24 dögum og jafnaði metið

Óskar Ófeigur Jónsson skrifar
Tryggvi Guðmundsson og félagar sjást hér fagna Íslandsmeistaratitlinum í opnu DV en þessi úrklippa er úr mánudagsblaðinu 22. september 1997.
Tryggvi Guðmundsson og félagar sjást hér fagna Íslandsmeistaratitlinum í opnu DV en þessi úrklippa er úr mánudagsblaðinu 22. september 1997. Skjáskot af timarit.is

Pepsi Max deild karla fer aftur af stað 13. júní næstkomandi. Það er mikil spenna fyrir því að boltinn fari aftur að rúlla en lengsta undirbúningstímabil í fótboltaheiminum varð enn lengra þökk sé kórónuveirunni.

Vísir ætlar að telja niður í fyrsta leik með því að rifja upp eitt og annað frá sögu úrvalsdeildar karla í knattspyrnu. Í dag eru 15 dagar í fyrsta leikinn sem verður á milli Vals og KR á Hlíðarenda 13. júní næstkomandi.

Nú er komið að fjórða manninum sem komst í nítján marka hópinn sem meðlimum í hópnum hefur síðan fjölgað síðan.

Tryggvi Guðmundsson jafnaði nítján ára gamalt afrek Péturs Péturssonar, ellefu ára gamalt afrek Guðmundar Torfasonar og fjögurra ára gamalt afrek Þórðar Guðjónssonar þegar hann skoraði nítján mörk fyrir Eyjamenn sumarið 1997.

Rétt eftir Verslunarmannahelgina 1997 og markalaust jafntefli ÍBV á móti botnlið Stjörnunnar þá var Tryggvi Guðmundsson kominn með átta mörk í tólf leikjum. Hann var með eins marks forskot á KR-inginn Andra Sigþórsson en litlar líkur voru á því að hann ætlaði að ógna eitthvað markameti deildarinnar.

Þá tóku við einir ótrúlegustu markadagar sem hafa sést hjá einum leikmanni í efstu deild á Íslandi. Tryggvi skoraði fyrst þrjú mörk í næstu tveimur leikjum og gerði síðan átta mörk á aðeins 24 dögum í septembermánuði.

Tryggvi var kominn með átján mörk eftir þrennu á móti Keflavík í næstsíðustu umferðinni en Eyjamenn tryggðu sér þá Íslandsmeistaratitilinn með 5-1 sigri.

Lokaleikur ÍBV var á móti Leiftri á Ólafsfirði og ÍBV steinlá þar 3-1. Tryggvi skoraði hins vegar mark Eyjaliðsins á 62. mínútu og jafnaði markametið. Tuttugast markið kom hins vegar ekki.

„Það var kannski enginn draumastaða að reyna að ná þessu meti gegn Leiftri á útivelli. Leiftur var búið að fá á sig næstfæst mörk í deildinni og það er alltaf erfitt að spila á Ólafsfirði,“ sagði Tryggvi Guðmundsson í viðtali í Íslenskri knattspyrnu 1997.

„Við vorum mun slakari aðilinn en ég náði að skora eitt mark uppúr engu, sem var ákveðinn léttir. Ég fékk hins vegar engin færi í viðbót til að jafna metið og er þar með kominn í hóp með góðum mönnum,“ sagði Tryggvi ennfremur í bókinni.

Tryggvi skoraði á móti öllum hinum níu liðum deildarinnar en stærsti hluti marka hans komu í seinni hálfleik eða 14 af 19 mörkum. Þá var hann sérstaklega öflugur út í Eyjum þar sem hann skoraði 15 mörk í 9 leikjum. Tryggvi skoraði í öllum níu leikjunum á Hásteinsvelli þetta sumar.

Tryggvi átti sumarið 1997 eitt besta tímabil allra tíma. Hann skoraði 38 mörk í öllum keppnum með ÍBV og íslenska landsliðinu, hann varð Íslandsmeistari, var kosinn leikmaður ársins af leikmönnum deildarinnar (fékk hornið), fékk gullskóinn og jafnaði auðvitað markametið.

Fjórði meðlimurinn í nítján marka klúbbnum

Tryggvi Guðmundsson, ÍBV 1997

  • 19 mörk í 18 leikjum
  • 15 á heimavelli - 4 á útivelli
  • 5 í fyrri hálfleik - 14 í seinni hálfeik
  • 6 mörk i fyrri umferð - 13 mörk í seinni umferð
  • 15 skot - 1 aukaspyrna - 3 skallamörk
  • 2 tvennur - 2 þrennur
  • 4 mörk á móti efstu þremur
  • 7 mörk á móti efri hluta
  • 12 mörk á móti neðri hluta
  • 3 mörk á móti falliðum
  • Markahæstu mánuðir:
  • 8 mörk í september
  • 4 mörk í maí
  • 3 mörk í ágúst
  • Flest mörk á móti einstökum liðum
  • 3 mörk á móti Keflavík
  • 3 mörk á móti Grindavík
  • 3 mörk á móti Val


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.