Sigraðist á krabbameini og bankar nú á dyrnar hjá Manchester United

Max Taylor hefur skrifað undir nýjan samning við Manchester United og ætlar sér að komast í aðallið félagsins. Það sem gerir sögu hans merkilegri en flestra annarra unglinga félagsins er að hann sigraðist á krabbameini á síðasta ári.

Hinn ungi Max Taylor fékk eistnakrakkamein árið 2018 og sigraðist á því eftir níu vikna lyfjameðferð. Margir innan félagsins hafa hrifist af hugarfari stráksins sem er að koma sterkur til baka.

Max Taylor var í stóru hlutverki hjá átján ára liði Manchester United sem vann Englandsmeistaratitilinn í sínum aldursflokki árið 2018. Í því liði voru menn eins og Brandon Williams, Angel Gomes, Tahith Chong og Mason Greenwood. Þetta eru allt leikmenn sem fengu tækifæri hjá Ole Gunnar Solskjær á síðasta tímabili.

Max Taylor hefur ekki náð að fylgja þeim eftir upp í aðalliðið enda stóð hann í sinni baráttu. Menn vonast nú til að þessi efnilegi knattspyrnumaður stigi stóra skrefið og fái tækifæri hjá aðalliðinu á næstunni.

Taylor hafði heppnina með sér að krabbameinið fannst en það uppgötvaðist í október 2018. „Blaðran er farin og krabbameinið líka. Hnúturinn var reyndar inn í eistanu og maður hefði því ekki getað fundið hann. Þetta var því blessun,“ sagði Max Taylor við Daily Mail.

Taylor fór í uppskurð 4. október þar sem vinstra eistað var fjarlægt og mánuði síðar fór hann síðan í níu vikna krabbameinsmeðferð. United sagði frá því í febrúar 2019 að strákurinn hefði brugðist vel við meðferðinni en hann fór engu að síður í aðra aðgerð nokkrum vikum síðar.

„Það var lágpunkturinn því ég gat þá ekki gert venjulega hluti. Ég gat ekki einu sinni setið upp af því að skurðurinn var gerður í gegnum kviðinn,“ sagði Taylor.

Taylor er tvítugur og þykir mjög efnilegur varnarmaður. Hann hefur verið hjá Manchester United síðan hann var fjórtán ára gamall og er auk þess fæddur og uppalinn í Manchester.

Hann fór að byggja upp þol og styrk að nýju í maí á síðasta ári.

Taylor skrifaði undir sinn fyrsta atvinnumannasamning við Manchester United í janúar 2018 og hann gat byrjað að æfa með liðfélögum sínum haustið 2019.

Jose Mourinho hrósaði Max Taylor á sínum tíma fyrir það hvernig strákurinn tókst á við áfallið.

Taylor spilaði sex sinnum með U23 liði Mancheter United í Premier League 2 á leiktíðinni og hann var líka í ungum leikmannhópi Manchester United sem fór til Astana í Kasakstan til að spila Evrópudeildarleik í nóvember á síðasta ári.

„Það er fullt af fólki þarna úti sem halda, eins og ég, að fólk muni bara eftir þeim af því að þau voru með krabbamein. Fólkið hrósar manni fyrir að hafa sigrast á krabbameininu. Ég held samt að skilaboðin eigi að vera önnur og meiri. Ég vil vera meira en sá sem sigraðist á krabbameininu,“ sagði Max Taylor.