Víðtækur stuðningur við útboð aflaheimilda í Færeyjum

Þingmaður færeyskra jafnaðarmanna á danska þinginu segir mikinn meirihluta Færeyinga styðja að allur fiskur í færeyskri lögsögu verði settur í útboð eins og nýlega var byrjað að gera með heimildir utan lögsögunnar.

Stjórnkerfi fiskveiða á Íslandi hefur verið þrætukefli í áratugi. Færeyingar byrjuðu í sumar að bjóða út eða bjóða upp úthafsaflaheimildir sínar og virðist sú aðferð njóta almenns stuðnings í Færeyjum.

Samfylkingin hefur lengst af ein flokka barist fyrir því að farin verði útboðsleið við úthlutun aflaheimilda og markaðurinn þannig látinn ráða verðinu á þeim og möguleikar nýrra aðila á að verða sér út um aflaheimildir auknir. En fleiri flokkar hafa síðan tekið upp svipaða stefnu og Jón Gunnarsson formaður atvinnuveganefndar og þingmaður Sjálfstæðisflokksins hefur jafnvel opnað á þá leið.

Sjúrður Skaale þingmaður færeyskra jafnaðarmanna á danska þinginu kynnti tilraun Færeyinga með útboð á aflaheimildum utan færeysku lögsögunnar í Barentshafi á fundi hjá Samfylkingunni í dag. Hann segir þessa aðferð hafa gefist vel.

En hverjir hafa fengið aflaheimildirnar í útboðum sem framkvæmd hafa verið?

„Það eru fyrst og fremst stóru útgerðirnar sem hafa fengið heimildirnar aðrir hafa einnig boðið í þær en ekki boðið nógu hátt og ekki fengið og enn aðrir hafa bankað á dyrnar,“ segir Sjúrður.

Útboðsleiðin nýtur stuðnings allra flokka á færeyska lögþinginu nema Fólkaflokksins og Sjálfstýriflokksins. Súrður er því bjartsýnn á að útboðsleiðin verði einnig tekin upp í útdeilingu aflaheimilda innan færeysku lögsögunnar í náinni framtíð.

„Nú liggur fyrir að ná víðtæku pólitísku samkomulagi í Færeyjum, á milli flokkanna,um það hvernig á að haga þessum málum í framtíðinni. Núverandi fiskveiðilöggjöf nær til ársins 2018 og þá þarf að semja nýja þannig að við höfum rúmt ár til að ná samkomulagi á stjórnmálasviðinu og meðal aðila vinnumarkaðarins,“ segir Sjúrður.

Þrátt fyrir andstöðu nokkurra stórra útgerða sé stuðningur við þessa leið meðal útgerða og kannanir sýni að mikill meirihluti landsmanna styðji þessa leið.

„Flestir Færeyingar eru þeirrar skoðunar að eignarétturinn sé þjóðarinnar. Þjóðin framselji síðan heimildirnar til útgerðarinnar,“ segir Sjúrður Skaale.