Lövenkrands lofar Malouda

Daninn Peter Lövenkrands, leikmaður Newcastle í ensku úrvalsdeildinni, segir að Florent Malouda, leikmaður Chelsea, sé mikill fagmaður og lofaði hann í hástert.

Þeir Lövenkrands og Malouda lentu í samstuði í leik Newcastle og Chelsea um helgina og þurfti að flytja þann fyrrnefnda upp á sjúkrahús í kjölfarið. Lövenkrands virtist eiga í vandræðum með andardrátt.

Hann greindi svo frá því á heimasíðu Newcastle í dag að Malouda hafi sett sig í samband við sig til að athuga hvernig honum liði.

„Hann hringdi í mig og sendi mér SMS fyrr í vikunni. Mér fannst það sýna mikla fagmennsku að hann hafi haft upp á númerinu mínu og haft samband við mig."

„En þetta var alls ekki honum að kenna og sagði ég honum það. Ég var með sýkingu sem hafði áhrif á mig fyrr í leiknum - mér leið bara ekki vel."

„Ég gat hvorki andað hné hlaupið almennilega og mér leið virkilega illa. Ég hélt að ég myndi skána eftir því sem myndi líða á leikinn en svo var ekki."

Hann vonast til að jafna sig fljótt á þessu og að hann geti hjálpað Newcastle í fallbaráttunni.