Hyggjast stofna Vestfjarðaakademíu

Til stendur að stofna félag fræðimanna á Vestfjörðum um næstu mánaðamót og hefur það fengið vinnuheitið Vestfjarðaakademían. Að stofnun félagsins standa Ólína Þorvarðardóttir, rektor Menntaskólans á Ísafirði, og Anna Guðrún Edvardsdóttir hjá Náttúrustofu Vestfjarða. Segir í tilkynningu frá þeim að markmið akademíunnar verði að mynda stuðningsnet og virkja krafta þeirra sem hafa æðri háskólamenntun og geta látið gott af sér leiða við eigin rannsóknir, þátttöku í vísindaverkefnum og/eða kennslu á háskólastigi. Er það trú þeirra að með stofnun slíks félagsskapar megi efla rannsóknir og fræðastörf á Vestfjörðum til góðs fyrir þekkingarsamfélagið þar. Stofnfundur Vestfjarðaakademíunnar verður haldinn í fyrirlestrarsal Menntaskólans á Ísafirði fimmtudaginn 2. júní.