Vanefndir í Hveragerði

Verktakafyrirtækið, sem annaðist framkvæmdir á fjölbýlishúsinu í Grafarholti, hefur nú verið tekið til gjaldþrotaskipta og hefur Guðjón Ægir Sigurjónsson lögmaður verið skipaður skiptastjóri í þrotabúinu. Fyrirtækið, sem um ræðir, mun vera í eigu bræðra og hefur annar þeirra tekið að sér að annast framkvæmdir á skrifstofu- og íbúðarhúsnæði í Hveragerði í eigin nafni. Eigendur þess húsnæðis hafa nú látið fara fram óháða úttekt á framkvæmdinni sem þeir telja verulega ábótavant en verktakinn átti að meðal annars að klæða húsið. Hann mun ekki hafa lokið verkinu á tilskildum tíma, fengið frest en lauk ekki við verkið innan þess frests sem hann hafði fengið. Nú telja eigendur hússins að verkið sé ábótavant og hafa haldið eftir hluta greiðslu vegna framkvæmdarinnar og bíða þess að fá niðurstöðu á úttektinni. Verktakinn vildi ekki tjá sig um málið þegar Fréttablaðið hafði samband við hann.