Menning

Kóp Boi bæjar­lista­maður Kópa­vogs

Atli Ísleifsson skrifar
Frá viðburðinum í Vatnsendaskóla fyrr í dag.
Frá viðburðinum í Vatnsendaskóla fyrr í dag. Kópavogsbær

Tónlistarmaðurinn Herra Hnetusmjör er bæjarlistamaður Kópavogs 2020, en tilkynnt var um valið í gamla skóla listamannsins, Vatnsendaskóla í Kópavogi, í dag á 65 ára afmæli Kópavogsbæjar að viðstöddum unglingum í 10. bekk skólans.

Í tilkynningu frá bænum segir að Karen E. Halldórsdóttir, formaður lista- og menningarráðs hafi kynnt tilnefninguna að viðstöddum Ármanni Kr. Ólafssyni bæjarstjóra Kópavogs. Herra Hnetusmjör tekur við keflinu af Rögnu Fróðadóttur textílhönnuði og myndlistarmanni.

„Herra Hnetusmjör hefur skapað sér sess sem einn vinsælasti tónlistarmaður þjóðarinnar undanfarin ár. Hann hefur unnið til fjölda verðlauna, átt plötu ársins og verið valinn flytjandi ársins á Hlustendaverðlaununum árin 2019 og 2020.

Herra Hnetusmjör hefur ekki farið leynt með stolt sitt af því að vera Kópavogsbúi og borið hróður bæjarins víða allt frá því að hann hóf að starfa sem tónlistarmaður árið 2014. Í textum hans er Kópavogur alltaf í forgrunni og hefur verið frá upphafi. Herra Hnetusmjör er einn stofnenda og liðsmaður fjöllistahópsins og útgáfunnar KBE (Kóp Bois Entertainment) sem gefið hefur út fjórar plötur og fjölmörg lög.

Herra Hnetusmjör stýrði sjónvarpsþáttaröðinni Kling kling í Sjónvarpi Símans á síðasta ári og rekur skemmtistaðinn 203 í miðbæ Reykjavíkur, en staðurinn vísar til póstnúmersins í Kópavogi.

Um þessar mundir nýtur Herra Hnetusmjör sín í föðurhlutverkinu ásamt því að vinna hörðum höndum að næstu plötu sem ætti að líta dagsins ljós fyrir árslok,“ segir í tilkynningunni.

Haft eftir Herra Hnetusmjöri að það sé alveg geggjað að fá viðurkenninguna frá Kópavogsbæ eftir að hafa lagt alla þessa vinnu inn. Þetta sé þvílíkur heiður og hann sé gríðarlega þakklátur. „Ég ætla að skjóta tónlistarmyndband um allan Kópavog á stöðum sem hafa mótað mig. Mig langar líka að koma sem flestum Kópavogsbúum í myndbandið en ég mun fara nánar út í þetta verkefni þegar þar að kemur. Ég þakka kærlega fyrir stuðninginn frá Kópavogsbúum gegnum árin og þakka Kópavogsbæ fyrir viðurkenninguna,“ er haft eftir listamanninum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.