Ferðamenn greiði aðgangseyri til Íslands

„Það má eiginlega segja að ræðan hennar sé ræðan sem ég ætlaði að halda,“ sagði Birgitta Jónsdóttir pírati um ræðu Vigdísar Hauksdóttur, þingkonu Framsóknarflokksins, á Alþingi í dag. Vísaði Birgitta í ræðu Vigdísar í umræðu um skatttekjur af ferðamönnum á Íslandi sem Oddný Harðardóttir í Samfylkingunni vakti máls á í dag.

Vigdís, sem er formaður fjárlaganefndar, sagði tímabært að endurskoða þá ákvörðun að aðilar í ferðaþjónustu greiddu lægri virðisaukaskatt en aðrar atvinnugreinar í landinu. Núverandi ríkisstjórn ákvað að lækka virðisaukaskatt á atvinnugreinar innan ferðaþjónustu úr 14 prósentum í 7 prósent síðastliðið vor.

Velti Vigdís fyrir sér að mikil fjölgun bílaleiga hér á landi, sem nú séu rúmlega hundrað, mætti rekja til þeirra hlunninda sem falin séu í innflutningi bíla til landsins.

„Bílaleigur þurfa ekki að eiga bílana nema í nokkra mánuði og geta svo selt þá á almennum markaði,“ sagði Vigdís. Ásókn í starfsemina sé mjög athugunarverð.

„Hvers vegna eiga Íslendingar að vera að borga niður bíla sem erlendir aðilar nota hér á landi?“

Vigdís lauk ræðu sinni á þeim nótum að fyrirkomulag um ferðamannapassa, sem verið hefði í umræðunni, væri einfaldlega of flókið. Betra væri að horfa til annarra þjóða, líka og Bandaríkjanna, og einfaldlega rukka ferðamenn sem sækja vilji Ísland heim. Gjaldið gildi í tvö til þrjú ár.

„Þá sé þá hreinlega aðganseyrir inn í landið og nær bæði yfir flug og skip.“

Birgitta tók sem fyrr segir undir orð Vigdísar

„Það gerist ekki alltof oft að ég er algjörlega sammála háttvirtum þingmanni Vigdísi Hauksdóttur,“ sagði Birgitta. Væri hún hjartanlega sammála hennar skoðun á flækjustiginu í kringum náttúrupassann og tillaga Vigdísar væri sú eina skynsamlega í stöðunni.

Bjarni Benediktsson, fjármála- og efnahagsráðherra, sagði að nánari greiningu þyrfti á tekjum af erlendum ferðamönnum hér á landi. Rannsóknum bæri ekki alveg saman og færu eftir forsendum hverju sinni. Þá væri einnig óljóst hvort lægri beinir skattar efldu tekjur af óbeinum sköttum. Nefndi hann sem dæmi að ódýrari gisting eða matur á veitingastöðum gæti skilað sér í aukinni verslun og skoðunarferðum.

Bjarni sagðist vilja fækka undanþágum þegar kæmi að virðisaukaskatti í ferðaþjónustunni og lækka bilið á milli þrepa í virðisaukaskatti hvað það varðaði. Kerfið þyrfti að einfalda. Umræða um náttúrupassa væri hins vegar allt önnur umræða sem þyrfti að ræða nánar.