Þættir um síðasta tímabil hjá Leeds byrja á sunnudaginn

Heimildaþáttaröðin Take Us Home: Leeds United hefur göngu sína á Stöð 2 Sport á sunnudaginn.

Þar er fjallað um síðasta tímabil hjá Leeds í ensku B-deildinni. Það var fyrsta tímabil liðsins undir stjórn Argentínumannsins Marcelo Bielsa.

Hann gjörbreytti gengi og leikstíl Leeds og liðið var lengst af tímabilsins á toppi deildarinnar.

Í þáttunum fá áhorfendur að skyggnast bak við tjöldin hjá þessu sögufræga félagi sem hefur átt erfitt uppdráttar síðustu ár.

Fyrsti þátturinn af Take Us Home: Leeds verður á dagskrá Stöðvar 2 Sports klukkan 20:00 á sunnudaginn. Þættirnir verða á dagskrá Stöðvar 2 Sports næstu sex sunnudagskvöld.