Lærisveinar Gerrard unnu stórsigur

Lærisveinar Liverpool goðsagnarinnar Steven Gerrard í Glasgow Rangers áttu ekki í nokkrum einustu vandræðum með Hamilton í skosku úrvalsdeildinni í fótbolta í dag.

Rangers er í eltingaleik við erkifjendur sína í Celtic um efsta sæti deildarinnar en Celtic stendur töluvert betur af vígi í þeirri baráttu.

Bláliðar minnkuðu forskot Celtic niður í fimm stig með öruggum 0-5 sigri á Hamilton eftir að staðan í leikhléi var 0-4 fyrir Rangers. Markaskorarar Rangers í leiknum voru Ryan Jack, Jermain Defoe, Scott Arfield, James Tavernier og Kyle Lafferty.

Celtic á þó leik til góða þar sem þeir fá Motherwell í heimsókn í dag.