Matthías tryggði Vålerenga stig

Matthías Vilhjálmsson tryggði Vålerenga stig gegn Kristiansund í norsku úrvalsdeildinni í kvöld. Lokatölur 1-1.

Kristiansund komst yfir á 8. mínútu með marki Bent Sormo.

Gestirnir leiddu í hálfleik og allt fram á 76. mínútu þegar Matthías jafnaði með skalla eftir aukaspyrnu frá Bard Finne.

Þetta var fimmta mark Matthíasar í norsku deildinni á tímabilinu. Hann er næstmarkahæsti leikmaður Vålerenga á eftir Nígeríumanninum Chidera Ejuke sem hefur skorað sex mörk.

Vålerenga, sem er ósigrað í síðustu fjórum leikjum, er í 5. sæti deildarinnar með 25 stig.