Elmar búinn að finna sér nýtt lið í Tyrklandi

Theódór Elmar Bjarnason hefur skrifað undir samning við Gazisehir í tyrknesku B-deildinni í knattspyrnu.

Elmar, eins og hann er oftast kallaður, hefur verið án félags síðan hann fékk samningi sínum við Elazigspor rift í nóvember. Þá hafði hann ekki fengið greidd laun í marga mánuði.

Einhverjar sögusagnir voru um að Elmar myndi snúa heim og leika með KR í Pepsi-deildinni næsta sumar en þessi 31 árs gamli miðjumaður hefur nú fundið sér nýtt lið.

Gazisehir er í þriðja sætinu í B-deildinni er hún er hálfnuð og er liðið fimm stigum á eftir öðru sætinu. Tvö efstu liðin fara beint upp í úrvalsdeildina en lið í sætum þrjú til sex fara í umspil.

Fyrsti leikur Elmars verður væntanlega þann 20. janúar er tyrkneski boltinn fer aftur af stað. Þá spila hans menn við Denizlispor á heimavelli en þeir eru í öðru sæti deildarinnar.

I am very excited to sign for the amazing club of Gazisehir, now I look forward to help the team to promote to the superleague @GazisehirFK pic.twitter.com/1R5y3qJ7bG

— Elmar Bjarnason (@ElmarBjarnason) January 5, 2019