Sara heldur áfram að auka forskot sitt á toppnum

Sara Sigmundsdóttir er í frábærum málum eftir magnaðan dag á CrossFit mótinu í Dúbaí en Sara er komin með 36 stiga forskot á toppnum eftir þrjár flottar greinar í dag. Björgvin Karl varð í fimmta sæti í sjöundu grein dagsins og er líka í fimmta sæti í heildarkeppninni fyrir lokadaginn.

Sara Sigmundsdóttir var þriðja fljótust í sjöundu greininni sem var krefjandi þrautabraut þar sem keppendur þurftu að klifra í köðlum, taka á því í róðravél, hoppa upp á kassa, henda þungum boltum og ganga ákveðna vegalengd með 60 kílóa stangir.

Fram undan er lokadagurinn á morgun og þó að þar verði örugglega nóg af stigum í boði þá gæti orðið erfitt fyrir hinar stelpurnar að stoppa Söru sem er í miklu stuði í hitanum í Sameinuðu arabísku furstadæmunum.

Sara komst upp í toppsætið með sigri í einu grein gærdagsins og fylgdi því eftir með því að auka forskot sitt í öllum þremur greinum dagsins.

Sara varð eins og áður sagði í þriðja sæti í síðustu greininni og varð því á topp þrjú í öllum greinum dagsins. Það þýðir 285 stig af 300 mögulegum í dag sem er magnaður árangur.

Sara er komin með 617 stig eftir sjö greinar og hefur nú 36 stiga forskot á hina slóvakísku Karin Frey.

Björgvin Karl Guðmundsson er í fimmta sæti eftir sjö greinar hjá körlunum. Í þremur greinum dagsins varð Björgvin í 3. sætt (grein 5), í 9. sæti (grein 6) og loks í 5. sæti í lokagreininni.

Staðan í kvennakeppninni fyrir lokadaginn:

1. Sara Sigmundsdóttir, Íslandi 617

2. Karin Frey, Slóvakíu 581

3. Samantha Briggs, Bretlandi 561

4. Gabriela Migala, Póllandi 552

5. Alessandra Pichelli, Ítalíu 545

6. Jamie Greene, Ástralía 527

7. Emily Rolfe, Kanada 516

8. Julie Hougård, Danmörku 501

Staðan í karlakeppninni fyrir lokadaginn:

1. Roman Khrennikov, Rússlandi  579

2. Brent Fikowski, Kanada 574

3. Jason Smith, Suður Afríku 553

4. Patrick Vellner, Kanada 552

5. Björgvin Karl Guðmundsson, Íslandi 529

6. Jeffrey Adler, Kanada 507

7. Tola Morakinyo, Bandaríkjunum 501

8. Jonne Koski, Finnlandi 489

Hér fyrir neðan má sjá allar keppnir þriðja dagsins.