Sport

Spyr af hverju áhrifavaldar fái fleiri vörustyrki en afreksíþróttafólk

Sylvía Rut Sigfúsdóttir skrifar
Sólveig Bergsdóttir landsliðskona í fimleikum segir erfitt fyrir íþróttafólk að fá styrki frá fyrirtækjum í dag.
Sólveig Bergsdóttir landsliðskona í fimleikum segir erfitt fyrir íþróttafólk að fá styrki frá fyrirtækjum í dag. Úr einkasafni

„Ég, landsliðskona í fimleikum og afreksíþróttakona, á erfiðara með að fá vörustyrki og/eða samstarf við heilsutengd fyrirtæki en áhrifavaldur í meðallagi á Íslandi. Skekkja? Fleira íþróttafólk sem tengir?“ skrifaði Sólveig Bergsdóttir í færslu á Twitter um helgina. Hún hefur fengið mjög sterk viðbrögð og segir í samtali við Vísi að það sé greinilegt að mikið af afreksíþróttafólki tengi við þetta.

„Ég var í samstarfi við fyrirtæki 2016 og 2017 og sótti svo um framlengingu á því 2018 og fékk höfnun. Ég var að fara að keppa á Evrópumóti svo það var ekki eins og það væri ekkert á döfinni hjá mér,“ segir Sólveig í samtali við Vísi.

Sólveig keppir með Stjörnunni og er einnig í kvennalandsliði Íslands í fimleikum. Hún hefur upplifað það þannig að eftir að áhrifavaldar byrjuðu að fá samninga við fyrirtæki, til dæmis tengd heilsu, hafi afreksíþróttafólk átt erfiðara með að safna styrkjum í tengslum við sína íþróttaiðkun, ferðalög á mót erlendis og þess háttar.

„Þetta er náttúrulega bara matsatriði hjá mér en mér finnst að þegar ég er kannski að horfa á stelpur sem eru bara í ræktinni, sem eru á styrkjum hjá heilsu- og íþróttafyrirtækjum, þá hugsar maður: „Af hverju gátu þeir ekki styrkt íþróttamann í staðinn?“ Ég hef verið að fylgjast með þessu á samfélagsmiðlum og finnst þetta frekar algengt.“

Sólveig Bergsdóttir landsliðskona í fimleikum segir erfitt fyrir íþróttafólk að fá styrki frá fyrirtækjum í dag. Mynd/Úr einkasafni

Fyrirtæki kjósa þennan valkost

Að hennar mati er oft um að ræða styrki sem gætu létt mjög undir með afreksíþróttafólki eins og tengt æfingafatnaði, íþróttaskóm, vítamínum, fæðubótaefnum, hollum mat eða öðru.

„Ég sat heima hjá mér að skoða stories á Instagram og var að fylgjast með stelpum, sem hafa örugglega aldrei þurft að borga 200.000 króna keppnisferð eitthvert eða landsliðsgalla eða eitthvað, taka upp gjafapoka frá Nike. Það kom bara upp smá hiti í mig, að þetta sé svona. Af hverju það er svona mikil skekkja í því að íþróttafólk þurfi að hafa svona rosalega mikið fyrir því að fá styrki þegar við erum að æfa líka 20 til 25 tíma á viku og reyna að vinna til þess að ná endum saman og til þess að borga fyrir ferðirnar okkar.“

Sólveig segir að það sé mjög erfitt, nánast ómögulegt, að fá peningastyrki en vörstyrkir geti samt breytt miklu fyrir afreksíþróttafólk.

„Þangað til að áhrifavaldar urðu svona áberandi í samfélaginu og á samfélagsmiðlum var miklu auðveldara fyrir íþróttafólk að fá vörustyrki. Einhver benti á það við færsluna mína að þetta fólk væri í rauninni að vinna við þetta, þetta væri vinnan þeirra að auglýsa vörur á samfélagsmiðlum. Fyrirtæki kjósa frekar að fara í þá átt heldur en að auglýsa vöruna sína hjá einhverjum sem að þau geta verið stolt af því að sé að nota vöruna.“

Veldur gremju

Á meðal þeirra sem tóku undir með Sólveigu í athugasemdum við færsluna voru Arna Stefanía Guðmundsdóttir Norðurlanda- og Íslandsmeistari í frjálsum íþróttum og Sif Atladóttir landsliðskona í knattspyrnu. Ólympíufarinn Brynjar Jökull Guðmundsson skrifaði við færsluna að flest afreksíþróttafólk hjá öllum sérsamböndum tengi við skrif Sólveigar og að þetta væri „galið.“ Brynjar Jökull var einn fremsti skíðakappi landsins og keppti á mörgum stórmótum fyrir Íslands hönd.

„Ég fékk miklar viðtökur. Ég er frekar ný á Twitter og ekki með mikinn fylgjendahóp þar, ég er kannski með fleiri á Instagram en það eru bara myndir, þar er ekki jafn mikil umræða. Þetta náði til margra og margir í sérsamböndum sem að þekkja þetta. Þetta vekur hjá manni smá gremju, maður er kannski fulltrúi Íslands á einhverjum stórum vettvangi og það er kannski út um allt í fréttunum og maður er ekkert að biðja um eitthvað mikið. Maður er kannski að biðja um ár af einhverjum vítamínum en ekki milljón í ferðastyrk.

Sólveig segir að hún hafi fengið mikil viðbrögð við færslu sinni á Twitter. Mynd/Úr einkasafni

Sólveig segir að það myndi hjálpa mikið að vera í samstarfi sem gæti létt undir með kostnaðinn tengdan fimleikunum, eins og til dæmis varðandi sjúkraþjálfun, æfingaskó eða annað. Hún vildi með færslunni ekki setja út á áhrifavalda heldur einfaldlega opna þessa umræðu.

„Þetta var ekki meint sem ádeila á fyrirtæki á Íslandi heldur meira svona almennt. Það er eitthvað rangt við það að sjá krakka skrá sig sem áhrifavaldur og fá allt þetta upp í hendurnar á meðan íþróttafólk situr heima, sveitt að reyna að vinna einhverja vaktavinnu til þess að komast á Evrópumót.“


Áhrifavaldar fara ekki í lyfjapróf

Þegar hún var sjálf með vörustyrk nýtti hún þann styrk vel og notaði vörurnar frá fyrirtækinu svo hún fann mikinn mun á þeim kostnaðarliðum hjá sér.
„Ég held að þetta myndi muna miklu fyrir mann, þó að það væri ekki nema einn aðili,“ segir Sólveig.  Hugsanlega er þetta alveg eins á öðrum sviðum, áhrifavaldar fái myndavélar að gjöf frekar en ljósmyndarar og svo framvegis. „Það er mjög skrítið að hugsa til þess að fólk sem hefði miklu meiri not fyrir hlutina og gæti verið miklu sterkari auglýsing fyrir fyrirtæki og vöruna, þau eru ekki að fá að nota vörurnar heldur bara fólk sem að vinnur við að opna einhverja pakka á myndbandi.“

Sólveig segir að sjálf myndi hún sem íþróttakona alltaf frekar velja að nota vörur sem að annað íþróttafólk kjósi að nota, frekar en einhver áhrifavaldur. 

„Það skiptir kannski áhrifavald engu máli hvort að próteinið sem hún er að borða sé hreint eða ekki, hún er ekki að fara í lyfjapróf á næsta Evrópumóti.“
En getur verið að þetta sé svona af því að það skili meiri sölutekjum fyrir fyrirtæki að láta áhrifavalda sýna vörurnar?

„Það er náttúrulega mjög góð spurning af því að þau eru auðvitað búin að gera einhverja rannsóknarvinnu á því hvað skilar þeim mestum tekjum, auglýsingatekjum og svo framvegis. Þannig að það getur vel verið, eða hvort það nái betur til almúgans þegar það er bara bloggari, einhver venjuleg stelpa að nota vörurnar,“ segir Sólveig. Hún vonar að einhver umræða vakni um þetta, sem geti kannski hjálpað einhverju íþróttafólki.


Tengdar fréttir

Bryndís segir nekt ákveðið frelsi: „Læk láta öllum líða vel“

Samfélagsmiðlastjarnan og sálfræðineminn Bryndís Líf hefur vakið mikla athygli fyrir myndir sem hún birti af sjálfri sér á samfélagsmiðlinum Instagram en Bryndís hefur ögrað stjórnendum miðlanna með myndum af sér þar sem hún sýnir brjóstin á sér, allt nema geirvörturnar.

300 þúsund króna peysa Herra Hnetusmjörs

Klárlega besta markaðsstönt ársins, segir Bjarni Ákason framkvæmdastjóri um frammistöðu rapparans Herra Hnetusmjörs í Garðpartýi Bylgjunnar á Menningarnótt.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.