Menning

Lækningar voru nátengdar göldrum 

Ari Brynjólfsson skrifar
Ólína Kjerúlf er meðal fyrirlesara á málþinginu um helgina.
Ólína Kjerúlf er meðal fyrirlesara á málþinginu um helgina. Fréttablaðið/Sigtryggur Ari

Lækningar voru í upphafi mjög nátengdar trúarbrögðum og galdraiðju,“ segir Ólína Kjerúlf Þorvarðardóttir, þjóðfræðingur og einn fyrirlesara á málþingi Félags áhugamanna um sögu læknisfræðinnar. Málþingið fjallar um galdra og lækningar og fer fram í Þjóðminjasafninu næstkomandi laugardag. Hefst málþingið kl. 10.30.

Íslandssagan greinir frá fjölmörgum galdramönnum sem reyndu að lækna sjúka með galdri og aðra sem komu sjúkdómum í fólk með fjölkynngi. Fyrstu læknarnir voru særingamenn sem börðust við sjúkdóma með alls kyns tákn og látbragð að vopni.

„Það vill svo vel til að ég er að gefa út bók, Lífgrös og leyndir dómar, sem fjallar um lækningar, töfra og trú í sögulegu ljósi. Þar greini ég frá þróun lækninganna, gömlum húslækningum og aðferðum sem sumar þykja undarlegar í dag en aðrar hafa staðist tímans tönn. Í raun varð ekki aðskilnaður milli galdra og lækninga fyrr en komið var fram á 18. öld,“ segir Ólína. „Það er svo auðvelt fyrir okkur í dag að horfa til baka með fordómafullu augnaráði og hnussa yfir þekkingu fólks á 17. öld. Öll sú læknisþekking sem við eigum er samt runnin frá þessum gömlu fræðum.“

Fleiri fyrirlesarar verða á málþinginu, þar á meðal Stephen A. Mitchell, prófessor í norrænum fræðum við Harvard-háskóla og Óttar Guðmundsson geðlæknir. Þá munu þrjár klassískar seiðkonur kyrja galdraþulur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.