Umfjöllun: Ísland - Andorra 2-0 | Súrsætt kvöld í Laugardalnum

Henry Birgir Gunnarsson skrifar
Gylfi Þór Sigurðsson landsliðsfyrirliði.
Gylfi Þór Sigurðsson landsliðsfyrirliði. vísir/daníel þór

Strákarnir okkar unnu skyldusigur á Andorra í kvöld en líkur liðsins á því að komast á EM í gegnum riðlakeppnina eru nánast að engu orðnar þar sem Frakkar og Tyrkir gerðu jafntefli.

Það þýðir einfaldlega að það dugir okkar mönnum ekki lengur að vinna lokaleiki riðilsins. Tyrkjum mun alltaf duga að vinna Andorra til þess að fara á EM. Strákarnir munu þó fá annað tækifæri í umspili sem hefst í mars.

Magnað afrek hjá Kolbeini

Leikurinn í kvöld fer seint í sögubækurnar fyrir gæði og skemmtun. Hann fer þó í sögubækurnar fyrir að Kolbeinn Sigþórsson gerði sér lítið fyrir og jafnaði markamet Eiðs Smára Guðjohnsen með landsliðinu. Ótrúlegt afrek og ekki síst í ljósi þess sem gengið hefur á hjá framherjanum á síðustu árum.

Hann hefði getað bætt metið er Ísland fékk vítaspyrnu en Gylfi Þór Sigurðsson tók spyrnuna og lét verja frá sér. Gylfi sterkur en það lá ekki fyrir honum að skora í kvöld. Hann átti líka aukaspyrnu sem fór í stöngina. Vítaspyrnan var slök hjá honum.

Það gerðist í raun lítið sem ekkert fyrsta hálftímann í leiknum. Okkar mönnum gekk illa að skapa færi og Andorramenn lágu djúpt til baka.

Arnór braut ísinn

Ísinn var loks brotinn á 38. mínútu. Guðlaugur Victor átti fallega fyrirgjöf í teiginn, Kolbeinn skallaði hann fyrir fætur hins unga Arnórs Sigurðssonar sem kom honum í netið. Fyrsta landsliðsmark Arnórs og alveg örugglega ekki það síðasta.

Fyrir utan markið var fátt að tala um. Liðið var frekar kraftlaust og lét Andorra-menn fara í taugarnar á sér. Það var vitað mál að það myndu gestirnir gera en engu að síður gengu strákarnir í gildruna. Forskotið var þó gott í hálfleikinn.

Svekkjandi tíðindi

Gestirnir voru í raun aldrei líklegir til þess að skora og því í raun bara spurning hversu stór sigur okkar manna yrði. Annað markið kom á 65. mínútu. Ragnar Sigurðsson átti sendingu fram, Kolbeinn pakkaði einum varnarmanni saman og skoraði laglega í sínu sögulega marki.

Þrátt fyrir fleiri færi þá náðu strákarnir ekki að bæta við en þeir kláruðu þetta skylduverkefni. Brosið var fljótt að breytast í skeifu er þeir löbbuðu af velli og fengu að heyra að Tyrkir hefðu jafnað gegn Frökkum. Það voru afar svekkjandi tíðindi en þeir munu fá fleiri tækifæri til þess að komast á EM. Þessari baráttu er ekki lokið.

Bein lýsing

Leikirnir




    Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
    Velkomin á Vísi. Þessi vefur notar vafrakökur. Sjá nánar.