Innlent

Leifar felli­bylsins Dorian ganga yfir landið

Sunna Kristín Hilmarsdóttir skrifar
Veðrið í dag mun minna meira á hefðbundna haustlægð en leifar kröftugs fellibyls.
Veðrið í dag mun minna meira á hefðbundna haustlægð en leifar kröftugs fellibyls. vísir/vilhelm
Leifar fellibylsins Dorian, sem olli mikilli eyðileggingu á Bahama-eyjum fyrr í mánuðinum, ganga yfir landið í dag að því er segir í hugleiðingum veðurfræðings á vef Veðurstofu Íslands.  



Í hugleiðingunum kemur fram að veðrið muni minna mun meira á hefðbundna septemberlægð heldur en leifar fellibyls þar sem styrkur Dorians sé nú orðinn það lítill.



Þá verða norðlægari vindar á morgun og rigning sem verður einkum bundin við norðanvert landið.



„Síðan taka við suðvestlægar áttir fram að helgi með skúrum um mest allt land. Á laugardag er síðan von á næstu lægð og ætlar hún að verða í blautari kantinum eins og staðan er núna. Hefðbundnar hitatölur, lítið um kulda og yfirleitt 5 til 10 stiga hiti að deginum,“ segir á vef Veðurstofunnar.



Veðurhorfur næstu daga:



Vaxandi austanátt, víða 8-13 í dag, en 13-18 við suðurströndina fram yfir hádegi. Rigning á sunnanverðu landinu og einnig norðan heiða síðdegis. Norðlægari vindur í kvöld.



Norðan og norðvestan 5-13 og rigning með köflum norðan á morgun, en lengst af þurrt syðra. Hiti 6 til 14 stig, mildast SA-til.



Á miðvikudag:

Norðan og norðvestan 5-13 m/s og rigning, en úrkomulítið sunnan heiða. Hiti 4 til 14 stig, mildast S-lands.



Á fimmtudag:

Fremur hæg suðvestlæg eða breytileg átt og víða dálítil rigning. Hiti 4 til 9 stig að deginum.



Á föstudag:

Suðvestan 5-13, hvassast S-til. Skúrir, en úrkomulítið A-til. Hiti breytist lítið.



Á laugardag:

Austlæg átt og rigning, en vestlæg átt um kvöldið. Hiti 5 til 10 stig.

Tengd skjöl




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.