Sex ára sambandi leikkonunnar Katie Holmes og fjöllistamannsins Jamie Foxx er nú lokið að sögn heimildarmanna People. Parið hefur verið saman frá árinu 2013 þó það hafi ekki verið mikið í sviðsljósinu.

Þrátt fyrir að parið hafi tekið saman árið 2013 og sögusagnir fóru að fara á flakk um samband þeirra fljótlega eftir það fóru þau ekki að sjást reglulega opinberlega saman fyrr en árið 2017. Þá sást til þeirra úti að borða og að njóta lífsins á ströndinni í Malibu en talið var að Holmes hafi þurft að fara leynt með samband sitt eftir skilnaðinn við Tom Cruise árið 2012. 

Að sögn heimildarmannsins lauk sambandi þeirra í maí, í sama mánuði og þau mættu saman á Met Gala. Var það í fyrsta sinn sem þau voru ljósmynduð saman á opinberum viðburði sem par. Áður höfðu þau verið saman í fyrirpartý Clive Davis fyrir Grammy verðlaunahátíðina en mættu þó í sitthvoru lagi.

Leyndin yfir sambandinu gerði fjölmiðlum oft erfitt fyrir og voru misvísandi sögur um samband þeirra. Á meðan margir sögðu sambandið alvarlegt og orðrómur um mögulega trúlofun, og jafnvel brúðkaup, fór á flakk stigu aðrir heimildarmenn og sögðu parið einungis vera góða vini. Nú hefur verið staðfest að þau voru vissulega saman, og hafa nú hætt saman.