Íslenski boltinn

Margrét Lára og Þorgrímur Þráins í sex manna vinnuhóp sem rýnir í afreksstarf fótboltans í Val

Óskar Ófeigur Jónsson skrifar
Haukur Páll Sigurðsson, fyrirliði Valsliðsins, hefur lyft bikurum fjögur sumur í röð en gerir það ekki í ár.
Haukur Páll Sigurðsson, fyrirliði Valsliðsins, hefur lyft bikurum fjögur sumur í röð en gerir það ekki í ár. Vísir/Bára

Þetta hefur verið athyglisvert sumar fyrir karlalið Vals í fótboltanum en Hlíðarendaliðið mun enda án titils í fyrsta sinn í fimm ár og þarf enn fremur á mjög góðum endaspretti að halda til þess að komast í Evrópukeppni.

Valsmenn hafa greinilega einhverjar áhyggjur af þróun mála því knattspyrnudeild Vals hefur nú skipað sex manna vinnuhóp til að rýna í afreksstarfið og yngri flokkana með það að leiðarljósi að bæta það og auka fagmennsku á öllum sviðum. Þetta kemur fram á fésbókarsíðu Vals.

Í fyrri útgáfu af fréttinni var meðal annars talað um að þessi vinnuhópur myndi eitthvað taka fyrir kaup á leikmönnum til félagsins en svo er ekki. Markmið vinnuhópsins er að tengja betur afreksstarfið og yngri flokka starfið hjá Val. Leikmannamálin sem slík tengjast þessu máli því ekki og verða því tekin fyrir á öðrum vettvangi. Valsmenn gerðu athugasemd við það og þær rangfærslur hafa hér með verið leiðréttar.

Jón Gretar Jónsson, fyrrum leikmaður Vals og Íslandsmeistari með KA, leiðir vinnuna en auk hans eru yfirþjálfararnir Eiður Ben Eiríksson og Haraldur Árni Hróðmarsson í hópnum. Í þessum sex manna vinnuhóp eru einnig Margrét Lára Viðarsdóttir, Soffía Ámundadóttir og Þorgrímur Þráinsson.

Karlarnir gætu kannski tekið sér kvennaliðið til fyrirmyndar en Valskonur eru á toppnum í Pepsi Max deild kvenna með 95 prósent stiga í húsi og 3,9 mörk skoruð að meðaltali í leik.

„Þau munu ræða við alla sem láta sig málið varða og skila deildinni niðurstöðum í byrjun september. Við getum alltaf gert betur og Valur hefur metnað til að bæta litlu hlutina sem skapa stóra sigra innan vallar sem utan. Við megum aldrei sofna á verðinum og ef allir leggjast á eitt, með hámarksárangur í huga, verður Valur í fararbroddi,“ segir í fréttatilkynningunni á fésbókarsíðu Vals eins og sjá má hér fyrir neðan.




Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.