Innlent

Ekki orðinn úrkula vonar um að Sjálfstæðisflokkurinn hafni þriðja orkupakkanum

Margrét Helga Erlingsdóttir skrifar
Sigmundur Davíð Gunnlaugsson segir að heilmikið hefði gerst í sumar sem þurfi að ræða í umræðum um þriðja orkupakkann sem fara fram í lok mánaðar.
Sigmundur Davíð Gunnlaugsson segir að heilmikið hefði gerst í sumar sem þurfi að ræða í umræðum um þriðja orkupakkann sem fara fram í lok mánaðar. Vísir

Sigmundur Davíð Gunnlaugsson, formaður Miðflokksins, horfir sérstaklega til þeirrar óánægju sem hefur gætt í baklandi Sjálfstæðisflokksins um þriðja orkupakkann þegar segist ekki vera búinn að missa alla von um að þingflokkur Sjálfstæðisflokksins muni hafna innleiðingu þriðja orkupakkans á svokölluðum „þingstubbi“ um mánaðamótin þegar orkupakkinn verður til umfjöllunar.

Sigmundur Davíð var gestur Kristjáns Kristjánssonar á Sprengisandi í morgun. Þeir ræddu um áætlun þingmanna Miðflokksins nú þegar fyrir liggur að þriðji orkupakkinn verður að öllum líkindum innleiddur á næstu dögum. Þeir ræddu þá einnig um Ísland og alþjóðasamstarf og framtíð EES samningsins.

„Hvað okkur varðar þá munum við gera enn eina tilraunina til þess að útskýra hvers vegna málið er, að okkar mati, stórvarasamt og bæta þá við afrakstri sumarsins, ef svo má segja, því það hefur orðið heilmikil umræða í sumar,“ segir Sigmundur Davíð möguleika Miðflokksins til að koma í veg fyrir innleiðinguna. Hann segir að Sjálfstæðisflokkurinn sé líklegastur af stjórnarflokkunum til að skipta um skoðun.

„En mér sýnist þetta liggja þannig að ef það eigi að takast að hindra innleiðingu þessa orkupakka þá verði að þar að koma eitthvað frumkvæði frá þingmönnum sjálfstæðsiflokksins held ég kannski sérstaklega, maður hefur helst verið að líta til þeirra því baklandið hjá þeim hefur verið öflugt í því að reyna að fá þingflokkinn sinn til að fylgja stefnu flokksins. Ég bind nú ennþá vonir við að mönnum geti orðið eitthvað ágengt í því þó ekki væri til annars en að málið fengi einhverja aðeins meiri bið, helst að senda beint aftur til sameiginlegu EES nefndarinnar.“

Sigmundur Davíð telur að einhverjir stjórnarliðar telji ranglega að orkupakkamálið muni falla í gleymskunnar dá innan fárra vikna.

„Ég held að því sé öfugt farið því vegna þess að ef þeir einfaldlega setja undir sig hausinn og afgreiða þetta – þá verði málið ekki gleymt heldur þá sé það rétt að byrja og þá sitji menn uppi með þetta til framtíðar. Ef þeir hinsvegar væru reiðubúnir til að endurskoða þetta eitthvað þá myndi ég að minnsta kosti ekki velta þeim upp úr því heldur telja það þeim til tekna og ég efast ekki um að flokksmenn í þessum flokkum myndu gera það líka á heildina litið.“

Aðspurður hvort þingmenn Miðflokksins hafi í hyggju að virða samkomulag um ekkert málþóf í umræðum um þriðja orkupakkann svaraði Sigmundur Davíð játandi.

„Það var gert formlegt samkomulag og við gerum ekki samkomulag öðruvísi en að ætla okkur að standa við það“.

Ef flokksmenn mótfallnir þriðja orkupakkanum ná að telja flokksforystu Sjálfstæðisflokknum hughvarf telur Sigmundur Davíð að hinir stjórnarflokkarnir tveir muni ekki „vera til vandræða heldur bara fylgja eins og þeir fylgdu eftir að þessi orkupakki var settur af stað og lagður fram í þinginu svoleiðis að nú er að sjá hvað gerist á lokasprettinum innan Sjálfstæðisflokksins. Ég er ekki orðinn alveg úrkula vonar.“

Bjarni Benediktsson, formaður Sjálfstæðisflokksins, sagði á opnum flokksfundi í Valhöll fyrr í mánuðinum að málflutningur Miðflokksins stæðist ekki skoðun.

Sigmundur segir að margir skráðir Sjálfstæðismenn hefðu reynt að beita sér gegn innleiðingunni í flokknum.

„Þingflokkurinn hélt nú fundi um allt land ekki alls fyrir löngu og þar hittu þeir marga af félögum sínum og fengu að heyra töluverða gagnrýni frá þeim, hugsanlega hefur það eitthvað haft áhrif.“

Flokksforysta Sjálfstæðisflokksins blés til fundar í Valhöll 10. ágúst síðastliðinn þar sem rætt var um þriðja orkupakkann.

„Það kom mér svolítið á óvart hvernig hann talaði á þeim fundi. Það fyrsta var að boða til þessa stóra fundar í húsnæði flokksins. Þá hefði maður haldið að hann ætlaði sér að nálgast þetta á einhvern nýjan hátt en í staðinn virtist leiðin áfram eiga að vera sú að setja undir sig hausinn og gera ráð fyrir því að allir flokksmennirnir í sjálfstæðsiflokknum og aðrir muni verða búnir að gleyma þessu eftir tvær vikur.“

Meginþorri fræðimanna telur að engin hætta sé á ferðum með innleiðingu þriðja orkupakkans. 

Hlustarðu ekkert á þá?

„Jú ég hlusta að sjálfsögðu á skýringar þeirra sem eru fylgjandi þessu enda þegar við ræddum málið í hvað var það 130 klukkutíma þá þurftum við nú auðvitað efni í allar þær ræður svo ég held að við séum nú öll í þingflokknum ágætlega vel inn í þessu og rökum bæði stuðningsmanna og andstæðinga. Megingallinn við rök þeirra sem tala fyrir þessu finnst mér vera sá að menn svona reyna að halda því fram að það sé ekkert víst að þetta valdi neinu tjóni og breyti í sjálfu sér litlu en engu að síður er alveg hamast við það á öllum vígstöðvum að reyna að þvinga þetta í gegn og jafnvel eins og ég rakti áðan í andstöðu við eigin flokksmenn á meðan þeir sem vara við þessu útlista nákvæmlega í hverju hætturnar liggja.“


Tengdar fréttir

Ekki skylda að leggja sæstreng

Fimm gestir komu á fund utanríkismálanefndar um þriðja orkupakkann. Formaður nefndarinnar segir ekkert nýtt koma fram. Varaformaður nefndarinnar setur spurningarmerki við hæfi héraðsdómara.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.