Sakar Katy Perry um kynferðislega áreitni

Í færslu á Instagram-síðu sinni skrifar leikarinn og fyrirsætan Josh Kloss um kynni sín af söngkonunni Katy Perry. Kloss kynntist Perry við tökur á tónlistarmyndbandinu við lagið Teenage Dream sem kom út í ágústmánuði árið 2010.

Í færslunni setur Kloss fram alvarlegar ásakanir í garð Perry og lýsir kynnum sínum við hana á neikvæðan hátt. Hann segir hana hafa verið afar indæla þegar þau voru tvö saman en þegar fleiri bættust í hópinn hafi hún verið „köld sem ís“ og gert í því að niðurlægja hann fyrir framan annað fólk.

„Hún sagði það vera „ógeðslegt“ að kyssa mig fyrir framan alla á tökustað þegar við vorum að taka upp. Ég var frekar niðurlægður en hélt áfram að gera mitt besta, þar sem fyrrverandi var upptekin við að halda framhjá mér og dóttir mín var bara smábarn, og vissi að ég þyrfti að þola þetta hennar vegna,“ skrifar Kloss.

Niðurlægður í afmælisveislu 

Alvarlegasta ásökunin kemur þó fram seinna í færslunni. Þar segir hann frá því að hann hafi mætt með vini sínum, sem var mikill aðdáandi Perry, í afmælisveislu stuttu eftir skilnað söngkonunnar við leikarann Russell Brand. Hann hafi kynnt vin sinn fyrir Perry og viðurkennir Kloss að á þeim tíma hafi hann verið frekar skotinn í söngkonunni.

„Þegar ég sneri mér við til þess að kynna vin minn, þá togaði hún Adidas-buxurnar mínar eins langt niður og hún gat til þess að sýna strákavinum sínum og hópnum í kring typpið á mér. Getur þú ímyndað þér hversu niðurlægjandi það var?“

Hann segist stíga fram með sögu sína núna þegar samfélagið virðist vera mjög upptekið af því að menn í valdastöðum séu pervertískir. Hann segir konur í valdastöðum alveg „jafn ógeðslegar“ og karlkyns jafnokar sínir.

„Svo, afmælisóskir til eins mest ruglandi, slítandi og niðurlægjandi verkefnis sem ég hef unnið að. Jeij #teenagedream,“ skrifar Kloss sem segist hafa ætlað að spila lagið á ukulele og syngja með því í tilefni níu ára afmælis þess en hafi hætt við þar sem hann vilji ekki hjálpa „kjaftæðisímynd“ hennar lengur.