Innlent

Trump hittir leiðtoga Grænlands og Færeyja í byrjun september

Kristján Már Unnarsson skrifar
Kim Kielsen tók á móti Lars Løkke Rasmussen á flugvellinum í Nuuk síðastliðið haust þegar forsætisráðherra Danmerkur kom til að undirrita flugvallasamninginn.
Kim Kielsen tók á móti Lars Løkke Rasmussen á flugvellinum í Nuuk síðastliðið haust þegar forsætisráðherra Danmerkur kom til að undirrita flugvallasamninginn. Mynd/TV-2, Danmörku.
Donald Trump Bandaríkjaforseti fundar með forystumönnum Grænlendinga og Færeyinga í Kaupmannahöfn í byrjun september þegar hann kemur við í Danmörku eftir heimsókn til Póllands. Þetta verður í fyrsta sinn í sögunni sem Bandaríkjaforseti hittir leiðtoga þessara næstu nágrannaþjóða Íslendinga. 



Megintilgangur Evrópuheimsóknar Trumps dagana 31. ágúst til 4. september er að minnast þess að 80 ár verða liðin frá innrás Þjóðverja í Pólland, sem markaði upphaf síðari heimsstyrjaldar. Trump tekur þátt í minningarathöfnum í Varsjá þann 1. september.

Donald Trump heilsar Lars Løkke Rasmussen, þáverandi forsætisráðherra Dana, við Hvíta húsið fyrir tveimur árum.Mynd/Hvíta húsið.
Danir urðu margir upp með sér þegar tilkynnt var að Bandaríkjaforseti og forsetafrúin Melania hyggðust í bakaleiðinni heilsa upp á Margréti Danadrottningu og Mette Frederiksen, nýbakaðan forsætisráðherra. Danskir fréttaskýrendur áttuðu sig þó fljótlega á því að Trump hafði minnstan áhuga á Danmörku, - Grænland er aðalmálið. 



Í opinberri fréttatilkynningu Hvíta hússins segir að heimsókn forsetans varpi ljósi á söguleg tengsl Bandaríkjanna, Póllands og Danmerkur, sem og vilja forsetans til að takast á við sameiginlegar öryggisáskoranir svæðisins. Þetta þýðir Grænland og norðurslóðir, lesa hermálasérfræðingar dönsku blaðanna á milli línanna, enda er Kim Kielsen, leiðtoga Grænlendinga, boðið að koma til Kaupmannahafnar til fundar með Trump, við hlið Mette Frederiksen.

Lars Løkke Rasmussen, þáverandi forsætisráðherra Danmerkur, tekur ljósmynd fyrir mótmælenda í Nuuk í heimsókn til Grænlands í fyrrahaust. Búist er við að kastljósið muni ekki síst beinast að Kim Kielsen, forsætisráðherra Grænlands, á fundinum með Trump í næsta mánuði, en Kielsen er til hægri á myndinni.Mynd/TV-2, Danmörku.
Lögmanni Færeyja, Aksel V. Johannesen, er einnig boðið að hitta Bandaríkjaforseta. Það er hins vegar óvíst hvort hann verði þá enn lögmaður því kosningar fara fram til Lögþings Færeyja þann 31. ágúst.



Kastljósið mun því meðal annars beinast að því sem fram fer á milli Trumps og Kims Kielsen, formanns landsstjórnar Grænlands. Bandaríkjamenn hafa lengi haft áhyggjur af áhuga Kínverja á Grænlandi og hernaðaruppbyggingu Rússa á norðurslóðum. Ákvörðun þeirra um milljarða fjárfestingu á Keflavíkurflugvelli er nýjasta dæmið um að þeir ætli sér að styrkja hernaðarmátt sinn í þessum heimshluta.

Vel fór á með leiðtogum Danmerkur og Bandaríkjanna í Hvíta húsinu þann 30. mars 2017. Danir fara með utanríkismál Grænlands.Mynd/Hvíta húsið.
Líklegt þykir að Thule-herstöðina og frekari uppbyggingu á Grænlandi muni bera á góma á fundi Trumps í Kaupmannahöfn. Þess er skemmst að minnast að bandaríska varnarmálaráðuneytið lýsti síðastliðið haust yfir vilja til þess að taka þátt í flugvallauppbyggingu Grænlands, aðeins viku eftir að Lars Løkke Rasmussen hitti Kim Kielsen í Nuuk og skrifaði undir tugmilljarða samning um stuðning danskra stjórnvalda við flugvallaverkefnið. 



Hér má sjá frétt Stöðvar 2 frá undirritun flugvallarsamningsins í fyrrahaust:


Tengdar fréttir

Bandaríkin blanda sér í flugvallamál Grænlands

Bandaríska varnarmálaráðuneytið hefur lýst yfir vilja til að taka þátt í flugvallauppbyggingu Grænlands í því skyni að styrkja stöðu Bandaríkjanna og NATO á norðurslóðum.

Danskur verktaki fær flugvelli á Grænlandi

Danska verktakafyrirtækið Munck Gruppen varð hlutskarpast í útboði um gerð nýrra flugvalla í Nuuk og Ilulissat á Grænlandi. Framkvæmdir hefjast í haust.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.