Beckham vill fá Ancelotti til að þjálfa nýja liðið sitt

David Beckham dreymir um að fá Carlo Ancelotti til að þjálfa nýja liðið sitt, Inter Miami, sem hefur leik í MLS-deildinni í Bandaríkjunum á næsta tímabili sem hefst í mars 2020.

Beckham er í óðaönn að undirbúa Inter Miami fyrir fyrsta tímabilið og í síðustu viku fékk hann fyrstu tvo leikmennina til liðsins; Matias Pellegrini og Julian Carranza frá Argentínu.

Beckham lék undir stjórn Ancelottis hjá AC Milan og Paris Saint-Germain og vill endurnýja kynnin við Ítalann reynslumikla.

Ancelotti er að hefja sitt annað tímabil sem knattspyrnustjóri Napoli. Hann á tvö ár eftir af samningi sínum við félagið.

Ancelotti hefur unnið landstitla á Ítalíu, Englandi, Frakklandi og Þýskalandi og þá hefur hann unnið Meistaradeild Evrópu í þrígang sem stjóri.

Auk Inter Miami kemur Nashville SC inn í MLS-deildina á næsta ári. Liðin í deildinni verða þá 26 talsins.