Leeds missti niður forystu í fyrsta heimaleiknum

Leeds United og Nottingham Forest skildu jöfn, 1-1, á Elland Road í fyrsta leik dagsins í ensku B-deildinni.

Leeds er á toppi deildarinnar með fjögur stig eftir tvo leiki en Forest er aðeins með eitt stig.

Staðan var markalaus í hálfleik en á 59. mínútu kom Pablo Hernández Leeds yfir.

Þetta var annað mark Spánverjans á tímabilinu en hann skoraði einnig í 1-3 sigri Leeds á Bristol City um síðustu helgi.

Mark Hernández dugði þó ekki til sigurs því Lewis Grabban jafnaði á 77. mínútu. Lokatölur 1-1 í fyrsta heimaleik Leeds á tímabilinu.