Erlent

Repúblikani segir rétt að ákæra Trump fyrir embættisbrot

Samúel Karl Ólason skrifar
Justin Amash, þingmaður Repúblikanaflokksins.
Justin Amash, þingmaður Repúblikanaflokksins. AP/Carly Geraci

Justin Amash, þingmaður Repúblikanaflokksins í Michigan og einn íhaldssamasti þingmaður Bandaríkjanna, varð í gærkvöldi fyrsti þingmaður flokks síns til að halda því fram að Donald Trump, forseti, hefði hagað sér á þann veg að hægt væri að ákæra hann fyrir embættisrétt. Þá sagði hann William Barr, dómsmálaráðherra, hafa vísvitandi afvegaleitt þjóðina varðandi niðurstöður Rússarannsóknarinnar.

Í röð tísta sem Amash birti í gær segir hann að flokkapólitík hafi grafið undan skiptingu valds í Bandaríkjunum og þar að auki segir hann að fáir þingmenn hafi í raun lesið skýrslu Robert Mueller. Sem er 448 blaðsíður. Gagnrýndi hann þingmenn harðlega fyrir að hafa tekið afstöðu með Trump án þess að lesa skýrsluna.

Þá segir hann að þrátt fyrir það hvernig dómsmálaráðherrann hefði reynt að teikna upp skýrslu Mueller, sýni hún fram á að hegðun Trump og aðgerðir hans mæti vel lágmarkskröfum ákærur fyrir embættisbrot.

Blaðamaður Politicio segir Amash reglulega deila við Trump og aðra Repúblikana þarna hafi hann þó tekið stöðu sem fjölmargir þingmenn Demókrataflokksins hafi verið hræddir við að taka. Síðustu daga virðist sem þeim Demókrötum hafi farið fækkandi og hefur þeim þingmönnum sem kalla eftir ákæru fjölgað.

Leiðtogar flokksins hafa þó ekki verið tilbúnir til að taka það til nánari skoðunar. Þess í stað vilja þeir halda rannsóknum þingnefnda fulltrúadeildarinnar áfram. Þar snúast nokkrar rannsóknir að forsetanum.

Amash segir að einungis eigi að ákæra fyrir embættisbrot í alvarlegustu tilvikum en aðstæður á þingi bjóði ekki upp á annað að svo stöddu.

„Þegar hollusta við stjórnmálaflokk er eða einstaklings trompar hollustu við stjórnarskrána, hrynur réttarríkið, sem er grundvöllur lýðræðis,“ skrifar Amash.

Í kjölfar tísta Amash var hann harðlega gagnrýndur af Ronna McDaniel, formanni landsnefndar Repúblikanaflokksins, fyrir að tala eins og Demókrati. Þá sagði hún að kjósendur í umdæmi Amash væru stuðningsmenn Trump.

Hún notaði svipuð orð og Trump hefur gert svo oft um Rússarannsóknina og sagði pólitíska andstæðinga hans, sem vilji sigra hann í kosningunum á næsta ári, vera þá einu sem væru enn að velta rannsókn og skýrslu Mueller fyrir sér.

Trump heldur því reglulega fram að skýrsla Mueller sýni fram á að hann hafi ekki verið í samstarfi með Rússum né að hann hafi reynt að hindra framgang réttvísinnar. Hvorugt er þó satt og Trump-liðar vinna nú hörðum höndum gegn því að Demókratar komi höndum yfir skýrsluna, án útstrikana, og gögn rannsóknarinnar.

Mueller fann ekki sannanir fyrir samsæri á milli framboðs Trump og Rússa, eins og það er skilgreint fyrir dómstólum, en hann tíuandaði fjölmörg skipti þar sem Trump-liðar áttu í samskiptum við rússneska embættismenn og sagði að starfsmenn framboðs Trump hefðu vitað af afskiptum Rússa af kosningunum 2016 og búist við því að hagnast af þeim.

Þá segir í skýrslu Mueller að hann hafi ekki viljað segja til um hvort að Trump hafi hindrað framgang réttvísinnar eða hvort ákæra ætti forsetann, vegna reglna Dómsmálaráðuneytis Bandaríkjanna um að ekki sé hægt að ákæra sitjandi forseta. Þessi í stað tíundaði Mueller tíu liði rannsóknar sinnar sem sneru að þeim möguleika. Þá sagði hann að ákvörðunin ætti að vera þingsins.

William Barr, dómsmálaráðherra Trump, lýsti því þó sjálfur yfir að ekki væri tilefni til að ákæra Trump. Sannanir Mueller dygðu ekki til ákæru eða sakfellingar fyrir dómi. Barr hefur verið harðlega gagnrýndu fyrir atferli sitt í tengslum við skýrslu Mueller.

Sjá einnig: Saka dómsmálaráðherra Bandaríkjanna um vanvirðingu gagnvart þinginu

Rúmlega 900 fyrrverandi alríkissaksóknarar hafa þó skrifað undir yfirlýsingu þar sem þeir segja að ef Trump væri ekki forseti væri hægt að ákæra hann.

„Hver okkar trúir því að framferði Trump forseta eins og því er lýst í skýrslu Mueller myndi, í tilfelli annarra persóna sem væru ekki varðar af reglum Dómsmálaráðuneytisins gegn því að ákæra sitjandi forseta, leiða til margra ákæra fyrir að hindra framgang réttvísinnar,“ skrifa saksóknararnir.

Sjá einnig: Alríkissaksóknarar segja hægt að ákæra Trump ef hann væri ekki forseti

Amash tekur undir það sjónarmið og segist sammála því að hver sem ekki væri forseti Bandaríkjanna hefði verið ákærður vegna skýrslu Mueller.


Tengdar fréttir

Trump veitir vini sínum og skjallara uppreist æru

Donald Trump, forseti Bandaríkjanna, veitti í gær auðjöfrinum Conrad M. Black, sem er vinur forsetans og fyrrverandi viðskiptafélagi sem fór fögrum orðum í Trump í bók sem hann gaf út í fyrra, uppreist æru.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.