Innlent

Segir skiljan­legt að Mið­flokks­menn reyni að beina at­hyglinni að öðru en um­mælum sínum

Nadine Guðrún Yaghi og Sylvía Hall skrifa
Bára Halldórsdóttir segir fullyrðingar Miðflokksmanna um upptökur úr öryggismyndavélum á Klausturbar vera rangar.
Bára Halldórsdóttir segir fullyrðingar Miðflokksmanna um upptökur úr öryggismyndavélum á Klausturbar vera rangar. Vísir/Arnar

Bára Halldórsdóttir segir fullyrðingar Bergþórs Ólasonar, þingmanns Miðflokksins, um innihald upptaka úr öryggismyndavélum á Klausturbar vera rangar. Í viðtali við Morgunblaðið segir Bergþór Ólason, þingmaður Miðflokksins, upptökurnar sýna að atburðarásin 20. nóvember hafi verið önnur en sú sem Bára hefur lýst og Sigmundur Davíð, formaður flokksins, tekur í sama streng í Fréttablaðinu þar sem hann segir upptökurnar skipulagðar og málið vera byggt á lygi. 

Í viðtalinu segir Bergþór upptökurnar frá umræddu kvöldi staðfesta þetta og það sé meðal annars ástæðan fyrir því að lögmenn Báru hafi barist gegn því að upptökurnar væru skoðaðar. Þá telur hann mikilvægt að komast til botns í því hvort Bára hafi átt samverkamenn, þá sérstaklega ef það hafi verið í samstarfi við fjölmiðil. 

Í samtali við fréttastofu segir Bára skiljanlegt að Bergþór vilji beina athyglinni að henni þar sem augljóst sé að hann hafi verið sá sem hafði sig mest frammi í umræðunum og hafi verið sá sem sagði verstu hlutina. Það myndi þó ekki skipta máli ef fullyrðingar hans væru sannar þar sem málið snúist um það sem þingmennirnir sögðu. 

„Jafnvel þó hann hefði rétt fyrir sér, sem hann hefur ekki, að þetta væri undirbúið, þá breytir það aldrei því sem þeir sögðu og það er það sem við eigum að vera að horfa á.“

„Ég hef séð sömu upptökur og get ekki séð hvernig hann kemst að þessari niðurstöðu“ 

Bára segist sjálf hafa horft á upptökurnar og hún geti ekki tekið undir atvikalýsingu Bergþórs. Hún sé einfaldlega tilraun til þess að beina athyglinni að öðru en sé fjarri sannleikanum.

„Mig langar bara að rifja upp fallegt orðbragð hans varðandi líffæri sín í öðrum konum og svo framvegis. Ég skil vel að hann vilji dreifa athyglinni frá því. Ég hef séð sömu upptökur og get ekki séð hvernig hann kemst að þessari niðurstöðu nema af því að honum langar til þess,“ segir Bára og bætir við að á upptökunni sjáist að hún hafi gefið sér góðan tíma bæði í að fara inn á barinn og að koma sér fyrir. Það sé ekkert sem bendi til að hún hafi mætt til þess eins að taka þingmennina upp.

„Við horfðum á sömu upptökur og ég get ekki sagt til um þessa mínútutölu sem hann er búinn að finna sér upp þarna. Þetta er bara bull, það sést alveg á þessum upptökum einfaldlega að þegar ég kem inn þá tek ég mér þónokkurn tíma til þess að skella mér á salernið þar sem það var mér efst í huga.“

Varðandi mynd sem var tekin af þingmönnunum í gegnum glugga barsins segir Bára það hafa komið fram í fjölmiðlum að hún hafi ekki tekið myndina og það sjáist einnig á upptökum að hún hefði ekki haft tíma til þess. 

„Á myndbandinu sést ég fara út úr bílnum mínum, taka fimmtán sekúndur til að fara inn á barinn og á þeim tíma er ekki nokkur tími til þess að taka þessa mynd og eins og blaðamenn Stundarinnar hafa sagt er þessi mynd ekki tekin af mér,“ segir Bára. 

Myndir náðust af þingmönnunum í gegnum glugga á barnum.

Rangt að hún hafi ekki viljað birta upptökurnar 

Í Morgunblaðinu segir Bergþór að Bára og hennar lögmenn hafi barist fyrir því að upptökurnar yrðu ekki birtar. Bára segir það ekki vera rétt.

„Við börðumst ekki fyrir því að upptökurnar yrðu ekki birtar, við börðumst fyrir því að það væri verið að tvíreka málið á tveimur stöðum og við vildum að það væri í höndum á ábyrgum aðilum eins og persónuvernd hvað við ættum að sjá en ekki í höndunum á þeirra lögfræðingum,“ segir Bára.

Þá ítrekar Bára að kjarni málsins sé orðræða þingmannanna, ekki hvernig upptakan hafi komið til. Hún skilji ekki hvers vegna Bergþór og þingmenn Miðflokksins séu stanslaust að vekja athygli á málinu þegar það sé alveg ljóst að þeir létu ljót orð falla á barnum.

„Aðalatriðið er það sem þeir sögðu, hann er sá sem er orðljótastur á upptökunni svo það er eðlilegt að hann vilji beina athyglinni að mér en hann ætti bara að axla ábyrgð á því sem hann sagði sjálfur.“


Tengdar fréttir

Siðanefnd Alþingis telur samræðurnar á Klaustri ekki einkasamtal

Siðanefnd Alþingis hefur skilað forsætisnefnd áliti vegna Klaustursmálsins svokallaða. Er það mat meirihluta nefndarinnar að samræðurnar sem fóru fram á barnum Klaustri á milli sex þingmanna Miðflokksins og Flokks fólksins geti ekki talist einkasamtal.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.