Tíska og hönnun

„Mikil gróska og kraftur er í faginu“

Stefán Árni Pálsson skrifar
Kristín Eva segir að kraftur sé í faginu.
Kristín Eva segir að kraftur sé í faginu. Ljósmynd/Magnús Elvar Jónsson

Alls voru 370 verk innsend til FÍT-verðlaun­anna 2019. Innsend verk í keppnina hafa aldrei verið fleiri en verðlaun­in verða af­hent við hátíðlega athöfn í Tjarnarbíói miðvikudaginn 27. mars. Öll verðlaunuð og viðurkennd verk verða til sýnis í Hafnarhúsinu í kringum HönnunarMars.

„Tilnefningum fjölgar töluvert á milli ára og ljóst að mikil gróska og kraftur er í faginu,“ segir Kristín Eva Ólafsdóttir, formaður Félags íslenskra teiknara.

„Keppnin nýtur sívaxandi vinsælda og virðingar meðal hönnuða og félagsmanna FÍT, enda skipta tilnefningarnar máli því öll tilnefnd verkefni öðlast þátttökurétt í Evrópuverðlunum fagfélega ADCE (Art Directors Club of Europe).“

Til­nefnt er í 21 flokki og ná þeir yfir helstu und­ir­flokka graf­ískr­ar hönn­un­ar. Má þar nefna skjágrafík, vef­hönn­un, prent­verk, hönn­un aug­lýs­inga og myndlýsingar. Að auki eru veitt sérstök verðlaun til þess verks sem þótti skara fram úr á meðal allra verðlaunaðra verka. Formenn dómnefnda í ár voru Arnar Ólafsson (skjáhönnun), Atli Hilmarsson (mörkun), Hildur Siguðardóttir (prent) og Hjörvar Harðarsson (auglýsingar).

Hönnunarmars

Félag íslenskra teiknara stendur fyrir veglegri samsýningu á HönnunarMars sem sýnd verður í porti Listasafns Reykjavíkur-Hafnarhúsi, þriðja árið í röð og hefur viðburðurinn verið einn sá mest sótti yfir hátíðina undanfarin ár.

Viðburðurinn mark­ar upp­haf Hönn­un­ar­Mars sem verður hald­inn 28. til 31. mars. Becky Forsythe verður listrænn stjórnandi sýningar FÍT 2019 í Hafnarhúsinu en hún starfar sem sýningarstjóri og rithöfundur.

Félag íslenskra teiknara er félagsskapur grafískra hönnuða og myndhöfunda á Íslandi. Aðalmarkmið FÍT er að efla starfsstéttina, kynna hana út á við og auka samstöðu félagsmanna. Formaður FÍT er Kristín Eva Ólafsdóttir.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.