Menning

Hátíðartónleikarnir hápunktur afmælisársins

Birgir Olgeirsson skrifar
Tónleikarnir fara fram í Ísafjarðarkirkju fimmtudaginn 21. mars klukkan 20 og í Langholtskirkju í Reykjavík sunnudaginn 24. mars klukkan 14.
Tónleikarnir fara fram í Ísafjarðarkirkju fimmtudaginn 21. mars klukkan 20 og í Langholtskirkju í Reykjavík sunnudaginn 24. mars klukkan 14. Tónlistarskóli Ísafjarðar

Tónlistarskóli Ísafjarðar fagnar um þessar mundir 70 ára afmæli og hefur af því tilefni staðið fyrir fjölmörgum tónlistarviðburðum. Hápunktur afmælisársins er svo í þessari viku þegar haldnir verða tvennir hátíðartónleikar, á Ísafirði á fimmtudag og í Reykjavík á sunnudag. Ungverska kammersveitin Müvak, hátíðarkór Tónlistarskóla Ísafjarðar og einsöngvarar sem allir eru fyrrum eða núverandi nemendur skólans auk kennara munu flytja fjölbreytt létt og skemmtileg verk.

„Við fengum þessa hugmynd fyrir þremur árum þegar nokkrir nemendur og kennarar skólans tóku þátt í sumarakademíu Tónlistarháskólans í Szeged í Ungverjalandi. Á lokahátíð akademíunnar spilaði þessi frábæra hljómsveit, Müvak, og við vissum að við yrðum að fá hana til að spila á Íslandi,“ segir Ingunn Ósk Sturludóttir, skólastjóri Tónlistarskóla Ísafjarðar.

„Undirbúningur fyrir tónleikana hefur legið á margra höndum og það er ævintýri líkast hversu samhentir ólíkir einstkalingar verða þegar markmiðið er að auðga litla samfélagið okkar hér á Ísafirði,“ segir Ingunn.

Yfirskrift tónleikanna er chacun à son goût (i. hver hefur sinn smekk) sem vísar í óperettuna Leðurblökuna eftir Strauss, en á efnisskrá tónleikanna eru einmitt þrjú verk úr óperettunni. Þar má einnig finna lög úr vinsælum söngleikjum á borð við Óliver og Hamilton.

„Við vildum endilega halda tónleikana bæði á Ísafirði og í Reykjavík til að sem flestir fengju tækifæri til að fagna afmælinu með okkur og auðvitað njóta þessarar skemmtilegu tónlistar í flutningi frábærra listamanna,“ segir Ingunn.

Tónleikarnir fara fram í Ísafjarðarkirkju fimmtudaginn 21. mars klukkan 20 og í Langholtskirkju í Reykjavík sunnudaginn 24. mars klukkan 14. Heiðursgestur tónleikanna í Reykjavík er frú Eliza Reid, forsetafrú.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.