Sara Björk lék allan tímann í stórsigri

Landsliðsfyrirliðinn Sara Björk Gunnarsdóttir var á sínum stað í byrjunarliði Wolfsburg þegar liðið burstaði Werder Bremen í þýsku úrvalsdeildinni í fótbolta í dag.

Wolfsburg tapaði í fyrsta sinn á þessari leiktíð í síðustu umferð þegar Sara Björk og stöllur hennar biðu lægri hlut fyrir Bayern Munchen. Í dag voru þær staðráðnar í að svara fyrir það tap með stæl og fór að lokum svo að Wolfsburg vann 6-0 sigur.

Danski snillingurinn Pernille Harder er af mörgum talinn besti leikmaður heims og hún var í stuði í dag þar sem hún hlóð í þrennu en Ewa Pajor, Claudia Neto og Caroline Hansen bættu við einu marki hver.

Wolfsburg á toppi deildarinnar með jafnmörg stig og Bayern Munchen en Wolfsburg hefur mun betri markatölu.