Náði myndskeiði af utanvegaakstri sem leiddi til 150 þúsund króna sektar

Ökumaður jepplings á Suðurlandi var sektaður um 150 þúsund krónur í síðustu viku fyrir að hafa ekið í hringi utan vegar á Skeiðarársandi. Þetta kemur fram í skýrslu Lögreglunnar á Suðurlandi um verkefni síðustu viku.

Árvökull vegfarandi varð var við hátterni ökumannsins og tók upp myndskeið. Myndskeiðið sendi hann lögreglu sem hafði í framhaldinu upp á ökumanninum. Var hann yfirheyrður og lauk málinu með 150 þúsund króna sektargreiðsslu.

Utanvegaakstur er óheimill samkvæmt lögum hér á landi en þó er heimilt að aka utanvega ef snjór er yfir öllu og aðstæður þannig að bifreiðin fer ekki niður úr snjónum og skemmi þannig jörð.