Segja Fletcher líklegastan sem yfirmann knattspyrnumála hjá United

Darren Fletcher er líklegastur til þess að taka við stöðu yfirmanns knattspyrnumála hjá Manchester United samkvæmt heimildum Sky Sports.

United er ekki með yfirmann knattspyrnumála en sú staða hefur verið í bígerðinni síðustu misseri. Margir hafa verið orðaðir við starfið, meðal annars Rio Ferdinand, en nú er hinn 35 ára Fletcher líklegastur.

Forráðamenn United eru sagðir vilja fá inn einhvern sem þekkir til félagsins og veit hvernig hlutirnir ganga fyrir sér á Old Trafford.

Darren Fletcheer spilaði fyrir Stoke á tímabilinu en er samningslaus í sumar. Hann fór í gegnum akademíu United og spilaði yfir 300 leiki fyrir aðallið félagsins.

Hann hefur ekki gefið neinar yfirlýsingar um að hann sé hættur í fótbolta, hvorki félagsliðafótbolta eða skoska landsliðinu.