Fékk sjö ára bann fyrir að bíta andstæðinginn í nefið

Leikmaður þýska neðrideildarliðsins Preussen Eiberg hefur verið dæmdur í sjö ára bann frá fótbolta eftir að hann beit andstæðing sinn í nefið.

Leikmanninum tókst að bíta hluta úr annari nös andstæðingsins og þurfti hann að dvelja á sjúkrahúsi í þrjá daga eftir atvikið.

Í gær var leikmaðurinn svo dæmdur í sjö ára bann, tvö þeirra skilorðsbundin.

Hvorki leikmaðurinn sem braut af sér né sá sem brotið var á hafa verið nafngreindir vegna laga um friðhelgi í Þýskalandi.

Það er þó vitað að gerandinn var fertugur karlmaður og var hann einnig kærður af lögreglunni í Essen fyrir líkamsárás. Hann hlaut þá refsingu að greiða 500 evrur til góðgerðarsamtaka og hann þarf að greiða málskostnað upp á 100 evrur.

Leikmaðurinn segist ekki hafa viljandi „framkvæmt bithreyfingu.“

Þegar Luis Suarez beit Giorgio Chiellini í öxlina á HM 2014 fékk hann fjögurra mánaða bann frá fótbolta, bann í næstu níu landsleikjum og þurfti að greiða sekt.