Gylfi haltraði af velli í dag - Landsleikirnir í hættu?

Gylfi Þór Sigurðsson haltraði af velli í leik Chelsea og Everton í dag en hann varð fyrir ljótri tæklingu frá Jorginho í leiknum í dag.



Gylfi var í byrjunarliði Everton að venju en var tekinn af velli á 76. mínútu leiksins.



Jorginho fékk gult spjald fyrir brotið en einhverjir hefðu viljað sjá annan lit á spjaldinu.



Marco Silva, stjóri Everton hefur áhyggjur af meiðslunum en hann var langt frá því að vera sáttur með tæklingu Jorginho.



Svo gæti farið að Gylfi missi af komandi landsleikjum gegn Belgíu í Þjóðardeildinni á fimmtudag og vináttulandsleik við Katar.



Bætir það ekki á vondar fréttir fyrr í dag er Jóhann Berg Guðmundsson þurfti að draga sig úr landsliðshópnum en Andri Rúnar Bjarnason var kallaður inn í hópinn í hans stað.