Dómari í bann fyrir að bjóða leikmönnum upp á leikinn „steinn, skæri, blað“

Knattspyrnudómari er á leiðinni í bann í þrjár vikur fyrir að nota ekki hefðbundna aðferð til að ákveða hvort liðið byrjaði með boltann.

Dómarinn heitir David McNamara og var þarna að dæma leik í ensku úrvalsdeild kvenna á milli Manchester City og Reading en hann fór fram 26. október síðastliðinn.

McNamara gleymdi peningnum sínum í klefanum og reyndi að bjarga sér með því að bjóða leikmönnum að fara í leikinn fræga „steinn, skæri, blað“. Það þótti alls ekki við hæfi.

A referee has been suspended for a game of 'rock, paper, scissors' at the start of a match. https://t.co/rgnjR8eaXFpic.twitter.com/FcUDfESkM4

— BBC Sport (@BBCSport) November 13, 2018

Enska knattspyrnusambandið segir að dómarinn hafi sætt sig við ákæruna um að starfa ekki með hagsmuni íþróttarinnar að leiðarljósi.

Samkvæmt fótboltalögum þá á að kasta upp pening í upphafi leiks til að ákveða hvort liðið byrjar með boltann.

Leikmennirnir sem fengu boð David McNamara voru enski landsliðsfyrirliðinn Steph Houghton og Kirsty Pearce, fyrirliði Reading.

Liðin gerðu 1-1 jafntefli í leiknum en honum var sjónvarpað beint.

21 dags bann David McNamars hefst 26. nóvember og stendur til 16. desember.