Ramsey fer frítt frá Arsenal næsta sumar

Aaron Ramsey mun yfirgefa Arsenal næsta sumar og mun félagið ekki fá eitt einasta pund fyrir þennan 27 ára gamla miðjumann þar sem samningur hans við félagið rennur út næsta sumar.

Sky Sports greindi frá þessu í gærkvöldi en samkvæmt sömu heimildum hefur Ramsey loks fengið útskýringu á því hvers vegna félagið dró samningstilboð sitt til kappans til baka á dögunum.

Ramsey hafði kvartað yfir því að fá ekki að vita hvers vegna Arsenal hætti við að bjóða honum samning en hann ku hafa fundað með forráðamönnum félagsins um helgina þar sem útskýrt var fyrir honum hvers vegna félagið vill ekki halda honum.

Búast má við að mörg af stærstu félögum heims muni keppast um kappann enda hefur hann verið einn af betri miðjumönnum enska boltans undanfarin ár en Ramsey kom til Arsenal árið 2008 frá Cardiff.