Nýr forseti Inter Milan 26 ára gamall

26 ára gamall Kínverji að nafni Zhang Kangyang, alltaf kallaður Steven Zhang er tekinn við sem nýr forseti ítalska stórveldisins Inter Milan en félagið tilkynnti þetta með myndbandi á öllum helstu miðlum sínum í morgun.

Hann er sonur kínverska auðjöfursins Zhang Jindong sem á meirihluta í félaginu í gegnum kínverska risafyrirtækið Suning.

Strákurinn tekur við forsetastöðunni af Indverjanum Erick Thohir sem hefur gegnt stöðunni undanfarin fimm ár en félagið hefur undirbúið forsetaskiptin undanfarna mánuði.

Steven er 21.forsetinn í 110 ára sögu félagsins og jafnframt sá yngsti til að gegna þessu hlutverki.

Argentínumaðurinn Javier Zanetti, sem er goðsögn hjá félaginu eftir að hafa spilað þar í fjöldamörg ár, hefur verið varaforseti félagsins frá árinu 2014 og mun halda áfram sem slíkur við hlið Steven.

Inter situr um þessar mundir í 3.sæti ítölsku úrvalsdeildarinnar, sex stigum á eftir toppliði Juventus.