Ronaldo: Fór út af forsetanum

Cristiano Ronaldo er í áhugaverðu viðtali við France Football í dag þar sem hann fer um víðan völl. Meðal annars um vistaskipti sín síðasta sumar.

Þá fór hann mjög óvænt frá Real Madrid til Juventus. Hann segist hafa farið því staða hans hjá félaginu hafi breyst.

„Ég fann sérstaklega frá forsetanum að það var ekki litið á mig eins og áður. Fyrstu fjögur til fimm árin leið mér eins og Cristiano Ronaldo en síðan minnkaði það,“ segir Ronaldo ekki sáttur við Florentino Perez, forseta Real.

„Forsetinn horfði á mig eins og ég væri ekki lengur ómissandi. Þá fór ég að hugsa mér til hreyfings. Að Zidane fór hafði engin áhrif á mína ákvörðun. Það staðfesti samt það sem ég hafði verið að hugsa.“