Innlent

Mengandi úrgangsefni eru enn á lóð United Silicon

Jóhann K. Jóhannsson skrifar
Mengandi úrgangsefni eru enn á lóð United Silicon í Helguvík, átta mánuðum eftir að verksmiðjan hætti rekstri. Eftirlit á vegum Umhverfisstofnunar er enn haldið áfram á meðan verksmiðjan hefur starfsleyfi en er mun umfangsminna.

Nýtt félag EM0117, dótturfélag Arion banka, tók við þrotabúi Sameinaðs Silicons í mars og tók þar með yfir starfsleyfi og losunarleyfi verksmiðjunnar.

Þremur dögum fyrir gjaldþrot verksmiðju United Silicon, í janúar, tók Umhverfisstofnun afstöðu til úrbótaáætlunar félagsins, vegna útistandandi frávika, sem voru áberandi á stuttu starfstíma verksmiðjunnar.

Áætlunin miðaði við að ýmsum úrbótum er varðaði geymslu hráefna til vinnslunnar, ráðstöfunar framleiðsluúrgangs og frágangi lóðar áður en verksmiðjan yrði gangsett að nýju sem er ekki heimilt nema með skriflegri heimild Umhverfisstofnunar.

Átta mánuðir eru síðan United Silicon fór í gjaldþrot og síðan þá hefur lítil sem engin starfsemi verið á svæðinu og óvíst hvenær og þá hvort framleiðsla hefjist að ný. Hráefni til kísilframleiðslunnar er enn þá á svæðinu óvarin fyrir veðri og vindum.

Unnið er að því að urða mengandi framleiðsluúrgangVísir/Jóhann K. Jóhannsson
Þau hráefni sem eru að finna á lóð verksmiðjunnar eru annars vegar framleiðsluefni, grein steinefni og timburflís sem verkfræðingur Umhverfisstofnunar telur ekki mikla mengun af og hins vegar framleiðslu úrgangur, sem geymdur hefur verið í stórsekkjum, sem að einhverju leiti hefur  hindra mengun í jarðveg.

„Við teljum að það sé lítil mengunarhætta fyrir hendi en hins vegar að þá geta verið einhverskonar óhreinindi sem geta skilað sér í jarðveginn,” segir Halla Einarsdóttir, verkfræðingur hjá Umhverfisstofnun.

Halla segir að framleiðsluúrgangurinn standist ekki útskolunarpróf og ströngustu kröfum um að efninu megi ráðstafa hvar sem er. Rekstraraðili verksmiðjunnar vinnur nú að því að koma efninu til urðunar í Álfsnesi, en áætlað er að um 2500 tonn af kolaryki sé að ræða.

Verksmiðjan hefur enn starfsleyfi og heldur Umhverfisstofnun uppi reglubundnu sem og fyrirvaralausu eftirliti á staðnum.

Brögð hafa verið á því að svæðið við United Silicon, hafi staðið opið eftir að verksmiðjan fór í þrot.Visir/Jóhann K. Jóhannsson
Rekstraraðilinn hefur skilað inn loka áætlun um frágang vegna rekstrarstöðvunar verksmiðjunnar.

„Við erum í rauninni að fylgjast með þeirri áætlun. Þeir eiga eftir að skila aðeins betri verklýsingum, hvernig þeir ætla standa skil á ýmsum þáttum,” segir Halla.

Í þeim þáttum er lög áhersla á hættu á mögulegri mengun frá hráefnum, framleiðsluúrgangi og auka afurðum en auk þess að afgirðing lóða sé tryggð en brögð hafa verið á því að svæðið hafi staðið opið eftir að verksmiðjan fór í þrot.


Tengdar fréttir

Gríðarlangur listi aðfinnslna í skýrslu Ríkisendurskoðunar um United Silicon

Úttekt Vinnueftirlits ríkisins, skortur á athugun á bakgrunni rekstraraðila og kröfuleysi við framkvæmd umhverfismats er meðal þess sem Ríkisendurskoðun setur út á í skýrslu sinni um United Silicon. Starfsemi fyrirtækisins var stöðvuð síðasta haust eftir ítrekaðar uppákomuar í rekstri verksmiðjunnar.




Fleiri fréttir

Sjá meira


×