Marcelo ekki með Brössum í dag

Vinstri bakvörðurinn öflugi, Marcelo, verður ekki með Brasilíu þegar liðið mætir Mexíkó í 16-liða úrslitum á HM í Rússlandi í dag.

Marcelo þurfti að fara af velli í sigri á Serbíu í lokaleik riðlakeppninnar vegna meiðsla í baki.

Felipe Luis, leikmaður Atletico Madrid, kom inná fyrir Marcelo og hann mun hefja leik í vinstri bakverðinum í dag en Tite, þjálfari Brasilíu, staðfesti byrjunarliðið á blaðamannafundi fyrir leikinn.

Takist Brasilíu að komast áfram má reikna með að Marcelo muni taka frekari þátt í mótinu þar sem meiðsli hans eru ekki sögð alvarleg og hefur hann æft með liðinu síðustu daga.

Leikur Brasilíu og Mexíkó hefst klukkan 14:00.