Liverpool ætlar að reyna aftur við Alisson eftir mistökin hjá Karius

Dagar þýska markvarðarins Loris Karius í marki Liverpool eru mögulega taldir eftir tvenn skelfileg mistök hans í úrslitaleik Meistaradeildarinnar á laugardagskvöldið.

The Daily Telegraph greinir frá því í morgun að Liverpool ætli að gera Roma nýtt tilboð í brasilíska landsliðsmarkvörðinn Alisson Becker sem liðið hefur haft augastað á í nokkrun tíma.

Liverpool var búið að slaka á áhuga sínum á Brassanum þar sem svo vel gekk með Karius í rammanum en Telegraph fullyrðir að nú ætli Klopp að fá Alisson í markið fyrir næstu leiktíð.

Alisson Becker er 25 ára gamall og hefur spilað með Roma síðan 2016 þangað sem hann kom frá Internacional í heimalandinu. Hann hefur verið einn besti markvörður ítölsku deildarinnar undanfarin ár og mun standa vaktina í marki Brasilíu á HM 2018.

Roma-liðið hafnaði í þriðja sæti ítölsku A-deildarinnar á síðustu leiktíð og komst alla leið í undanúrslit Meistaradeildarinnar eftir frækinn sigur á Barcelona.

Þar strandaði liðið aftur á móti á Liverpool sem hafði betur í undanúrslitarimmu liðanna. Nú gæti Alisson sem tapaði fyrir Liverpool þar verið á leið á Anfield.