Ringo Starr sæmdur riddaratign

Ringo Starr, trommuleikari Bítlanna, var í dag sæmdur riddaratign fyrir framlag sitt til tónlistar. Athöfnin fór fram í Buckinghamhöll og var það Vilhjálmur, hertoginn af Cambridge, sem sló Ringo til riddara.

Í viðtali við breska ríkisútvarpið, BBC, sagði Ringo að það væri afar ánægjulegt að hljóta nafnbótina riddari en að hann hafi saknað hljómsveitarfélaga sinna, enda ekki vanur því að vera einn í sviðsljósinu.

21 ár er síðan Paul McCartney, bassaleikari Bítlanna, var sæmdur riddaratign en Ringo segir að hann hafi fengið góð ráð frá vini sínum, meðal annars að brosa alla athöfnina.

Ringo heitir réttu nafni Richard Starkey og er hann enn ekki búinn að ákveða hvort hann vilji vera titlaður Sir Ringo Starr eða Sir Richard Starkey. Hann segist hins vegar vera búinn að ákveða að vera alltaf með orðuna sem fylgi nafnbótinni þegar hann snæðir morgunverð.