Fyrrum leikmaður Grindavíkur aldrei séð framherja með verri snertingar en Lukaku

Belgíski sóknarmaðurinn Romelu Lukaku liggur undir harðri gagnrýni innan Manchester United samfélagsins þessa dagana.

Þessi stóri og stæðilegi framherji hefur ekki skorað í níu síðustu leikjum Man Utd og átti vægast sagt slæman dag þegar Man Utd tapaði fyrir Juventus í Meistaradeild Evrópu á þriðjudag.

Einn af þeim sem gagnrýnir Lukaku er Lee Sharpe, sem lék með Grindavík í Landsbankadeildinni sumarið 2003 en hann var upp á sitt besta hjá Manchester United 1988-1996 þar sem hann varð þrisvar sinnum Englandsmeistari.

„Ég hef aldrei séð framherja með jafn lélegar snertingar á boltann. Ef framherjinn þinn getur ekki haldið boltanum uppi á vellinum er mjög erfitt að spila fótbolta,“ segir Sharpe sem kveðst hafa lausn á vandamálinu.

„Hann talar um hann sé þreyttur eftir að hafa spilað mikið á HM. Ég held að það væri best að gefa honum hvíld. Senda hann burt í frí í nokkrar vikur.“