Sara Björk frá í 4-6 vikur vegna meiðsla

Landsliðsfyrirliðinn Sara Björk Gunnarsdóttir mun ekki spila með þýska meistaraliðinu Wolfsburg næstu vikurnar vegna meiðsla.

Wolfsburg greinir frá því á heimasíðu sinni að Sara Björk verði frá í 4-6 vikur vegna meiðsla í hné. Sara Björk hefur ekki komið við sögu í síðustu tveimur leikjum liðsins og er nú ljóst að hún mun ekki spila með liðinu fyrr en í fyrsta lagi í desember.

Sara missir af næstu deildarleikjum Wolfsburg en ekki er leikið í Meistaradeildinni fyrr en á næsta ári svo hún ætti ekki að missa af næstu leikjum þar.

Wolfsburg er á toppi þýsku Bundesligunnar með fullt hús stiga, sjö stigum á undan Bayern München í öðru sætinu.