Októberbyltingarinnar minnst með útgáfu bókar

Nýrri bók um októberbyltinguna verður fagnað með hátíð í Iðnó á morgun. Októberbyltingin markar upphaf Sovétríkjanna. Höfundurinn er nýkominn úr kosningabaráttu sem hann segir hafa krafist mikillar vinnu. Ætlar næst að bjóða fram í öllum kjördæmum á landinu.

„Ég las hana upphaflega fyrir næstum 40 árum og margt sem sat enn í minninu þegar ég fór að lesa hana aftur núna. Það má segja að kosningarnar í fyrra hafi tafið verkefnið dálítið mikið, en það tók næstum allan tímann milli kosninga,“ segir Þorvaldur Þorvaldsson, formaður Alþýðufylkingarinnar.

Þorvaldur hefur lokið við að þýða bók eftir ameríska blaðamanninn John Reed um októberbyltinguna 1917 í Rússlandi. Bókin er gefin út hér á landi í tilefni af 100 ára afmæli byltingarinnar.

„Bókin fjallar um aðdragandann að byltingunni. Hann kemur til Pétursborgar snemma í september og aflaði mikill gagna. Megnið af bókinni fjallar um fyrri hluta nóvember. Hann segir ítarlega frá lykilatburðum í byltingunni,“ segir Þorvaldur. Bókin kom út upphaflega 1919 og hefur komið út á mjög mörgum tungumálum. Hún hefur hins vegar ekki komið út á íslensku áður.

Októberbyltingin var undanfari að stofnun Sovétríkjanna. „Hún er eiginlega fæðing Sovétríkjanna en þau voru náttúrlega stofnuð formlega 1922, eftir borgarastríðið,“ segir Þorvaldur. Í tilefni af útgáfu bókarinnar standa fern samtök að hátíðarfundi í Iðnó á þriðjudaginn. Það eru Alþýðufylkingin, MFÍK, MÍR og Sósíalistaflokkur Íslands. Bókin er prentuð í Finnlandi og Þorvaldur vonast til þess að búið verði að senda nokkur eintök heim áður en fundurinn fer fram. Síðan verður útgáfuhóf á fimmtudaginn.

Þorvaldur er annars að jafna sig eftir snarpa kosningabaráttu. „Þessi praktíski undirbúningur var rosalega mikil vinna, enda aðdragandinn eiginlega sá stysti sem lög gera ráð fyrir og meira að segja stærstu framboðin áttu fullt í fangi, til dæmis í því að ná meðmælendum,“ útskýrir hann.

Þorvaldur segir að Alþýðufylkingin muni bjóða fram aftur næst og þá ætlar flokkurinn að bjóða fram í öllum kjördæmum.